राजपामा चर्को विवाद

काठमाडौं। राष्ट्रिय जनता पार्टी (राजपा) मा विवाद सिर्जना भएको छ । अध्यक्ष मण्डलका संयोजक राजकिशोर यादवले शुक्रबारका लागि राजनीतिक समितिको बैठक आहृवान गरेपछि नेतृत्व तहमै विवाद बढेको हो।संयोजक यादवको उक्त कदमलाई अध्यक्ष मण्डलका चार सदस्यले ‘अवैधानिक’ भनेका छन् । महन्थ ठाकुर, राजेन्द्र महतो, महेन्द्र राय यादव र शरदसिंह भण्डारीले अध्यक्ष मण्डलको सहमतिबिना राजनीतिक समितिको बैठक बोलाउन नमिल्ने भन्दै विरोध जनाएका हुन् ।

अध्यक्ष मण्डलका अर्का सदस्य अनिल झाले भने संयोजक यादवको समर्थन गरेका छन् । उनले छलफलबाट भाग्न नमिल्ने तर्क गरे ।समाजवादी पार्टीसँग एकता प्रक्रियाका लागि विभिन्न कोणबाट छलफल चलिरहेको समयमा राजनीतिक समितिको बैठक बोलाएर एकताको वातावरण भाँड्न खोजेको आरोप असन्तुष्ट पक्षको छ । अध्यक्ष मण्डलका चार सदस्य पार्टीको महाधिवेशन अघि नै समाजवादी पार्टीसँग एकता प्रक्रिया टुंगोमा पु¥याएर ‘एकता महाधिवेशन’ गराउनुपर्ने पक्षमा छन् । संयोजक यादव र अध्यक्ष मण्डलका सदस्य झा भने महाधिवेशन अघि पार्टी एकता गर्न नहुने पक्षमा रहेको स्रोत बताउँछ ।

संयोजक यादवले महाधिवेशन, एकता प्रक्रिया लगायतका विषयमा छलफल गर्न राजनीतिक समितिको बैठक बोलाइएको जिकिर गरे । असन्तुष्ट पक्षले भने समाजवादी पार्टीसँग एक खालको समझदारी भएर एकता प्रक्रियाका लागि छलफल चलिरहेको समयमा राजनीतिक समितिको बैठक राखेर विवाद बढाउने प्रयास भएको आरोप लगाएको छ ।महासचिव केशव झाले अध्यक्ष मण्डलको सहमतिबिना राजनीतिक समितिको बैठक बोलाउन नमिल्ने तर्क गरे । राजनीतिक समितिमा २७ सदस्य छन् । अध्यक्ष मण्डलका असन्तुष्ट सदस्यहरू बैठकमा सहभागी नहुने बताइएको छ।