राष्ट्रको चिन्ता गर्ने पार्टी एमाले मात्र : अध्यक्ष ओली

काठमाडौं । नेकपा एमालेका अध्यक्ष एंव पूर्वप्रधानमन्त्री केपी शर्मा ओलीले राष्ट्रको चिन्ता गर्ने पार्टी एमालेमात्र भएको बताएका छन् । आइतबार किर्तिपुर नगरपालिकाको प्रथम नगरसभालाई सम्बोधन गर्दै अध्यक्ष ओलीले यस्तो बताएका हुन् ।

एक फरक प्रसंगमा ओलीले पहिलो चरणको निर्वाचनमा एमालेले धेरै ठाउँमा जितेको तर दोस्रो चरणको निर्वाचनमा  एमालेले एमालेलाई हराएको भन्दै अन्तरघातीलाई निर्मम कारवाही हुने चेतावनी दिएका छन् । उनले पार्टी भित्रका केही व्यक्तिहरुको अन्तरघातले झापाको गौरादह, बुद्धशान्ति र मेची नगरपालिकामा प्रमुख हारेको बताए । उनले उक्त नगर प्रमुखको हार्नुको कारण खोज्न जिल्ला नेतृत्वलाई निर्देशन समेत दिएका छन् ।

‘हामीले सधैं जित्ने गरेका ठाउँमा किन र कसरी हारियो ? मलाई एक साताभित्र स्पष्टकरण चाहिन्छ’ ओलीले भने, ‘सधैंभरि एमाले हुने एक दिन मतदान केन्द्रमा गएर रुखमा भोट हाल्ने मान्छे एमालेमा रहन पाउँदैन, त्यस्ता मान्छेको एमालेका स्थान छैन ।’