राष्ट्रपति भारत भ्रमणमा जाँदा-आउँदा दुबै दिन सार्वजनिक विदा

सरकारले राष्ट्रपति विद्या भण्डारी भारत भ्रमणमा जाने र आउने दुबै दिन सार्वजनिक विदा दिने निर्णय गरेको छ ।

आइतबार बसेको मन्त्रिपरिषद बैठकले राष्ट्रपतिको भारत भ्रमण स्वीकृत गर्दै विदाको निर्णय गरेको हो ।
राष्ट्रपति विद्यादेवी भण्डारी ३४ सदस्यीय टोलीसहित आज भारत भ्रमणमा जाँदैछिन् । राष्ट्रपतिका रुपमा उनको यो पहिलो विदेश भ्रमण हुनेछ ।
विगतमा राजाहरुको विदेश भ्रमणमा निस्कँँदा सार्वजनिक विदा दिने प्रचलन थियो । गणतन्त्र स्थापना पछि यो प्रचलन हट्यो । गणतन्त्र नेपालका प्रथम राष्ट्रपति विदेश भ्रमणमा जाँदा सार्वजनिक विदा दिइएन ।

तर, अहिले फेरि ‘शाही शैली’मा नै राष्ट्रपतिको विदेश भ्रमणमा विदा दिने निर्णय भएको छ ।
भारतका राष्ट्रपति मुखर्जी गत कात्तिक १७ नेपाल आउँदा पनि प्रचण्ड सरकारले सार्बजनिक विदा दिएको थियो, जसको जनस्तरबाट चर्को आलोचना भएको थियो ।

राष्ट्रपतिको यो भ्रमण राजकीय हो । ३४ सदस्यीय भ्रमण टोलीमा परराष्ट्रमन्त्री डा. प्रकाशशरण महत, शान्तिमन्त्री सीतादेवी यादव लगायत छन् ।
राष्ट्रपति भण्डारीले भारत बसाईको क्रममा समकक्षी प्रणव मुखर्जी, उपराष्ट्रपति हमिद अन्सारी र प्रधानमन्त्री नरेन्द्र मोदी लगायतसँग शिष्टाचार भेट गर्नेछिन् । उनले गुजरात र उडिसा राज्यको पनि भ्रमण गर्ने कार्यक्रम छ ।
राष्ट्रपति भण्डारी शुक्रबार स्वेदश फर्कने छिन् । र, त्यो दिन पनि सार्वजनिक विदा हुने छ |
मुखर्जी नेपाल आउँदा भारतमा भने विदा थिएन। भारत, अमेरिका लगायतका देशमा राष्ट्रपति बाहिर जाँदा वा अन्य देशको राष्ट्रपति आउँदा विदा दिने चलन छैन।