वाइडबडी भ्रष्टाचार : परिमार्जित प्रतिवेदनमाथि आज लेखा समितिमा छलफल हुँदै

काठमाडाैँ । वाइडबडी विमान खरिदमा भएकाे अनियमितताबारे संसदीय उपसमितिले तयार पारेकाे प्रतिवेदनमा आज छलफल हुने भएको छ ।

संघीय संसदकाे प्रतिनिधिसभा अन्तरगतकाे सार्वजनिक लेखा समितिको बैठकमा उपसमितिले तयार पारेको साे परिमार्जनसहितकाे प्रतिवेदनमाथि छलफल हुने भएको हो ।

नेपाली कांग्रेसका सांसद राजन केसीको संयोजकत्वमा गठित उपसमितिले वाइड बडी विमान खरिदमा ४ अर्ब ३५ करोड भन्दा बढीको भ्रष्टाचार भएको निष्कर्ष निकालेको थियो । उपसमितिले बहालवाला मन्त्री रवीन्द्र अधिकारीसहित दुई पूर्व मन्त्री तथा मन्त्रालयका बहालवाला तथा पूर्व सचिव एवम् निगमका अधिकारीमाथि कारवाहीको सिफारिस गरेको छ ।

उपसमितिको प्रतिवेदनमाथि शुक्रबारदेखि समितिमा छलफल सुरु भएको हो । शुक्रबार भएको छलफलमा सत्ता पक्षका सांसदले उपसमितिको प्रवितेदन सन्तुलित नरहेको आरोप लगाएका थिए । उनीहरुले उपसमितिले नियोजित रुपमा प्रतिवेदन तयार पारेको भनेका थिए भने कांग्रेसका सांसदले प्रतिवेदन सही रहेको बताएका थिए ।

बैठकले समितिका सभापति भरतकुमार शाहलाई प्रतिवेदनमा केही परिमार्जन गर्न अधिकार दिएको थियो ।