वातावरण विभागले प्रदूषण जाँच गर्ने उपकरण जडान गर्ने तयारी

वातावरण विभागले आगामी आर्थिक वर्षमा धुवाधुलो प्रदूषण जाँच गर्ने उपकरण जडान गर्ने तयारी गरेको छ । काठमाडौं र पोखरा गरी सात ठाउँमा उपकरण जडान गर्ने योजना रहेको विभागका प्रवक्ता मोहनदेव जोशीले बताए ।

काठमाडौंमा चार र पोखरामा तीनवटा उपकरण जडान गरिनेछ । रत्नपार्क, कुपनडोल, धुलिखेल, सौराह र लुम्बिनीमा यसअघि नै उपकरण जडान गरिसकिएको छ । देशभर ५६ स्थानमा उपकरण राख्ने सरकारी योजना छ । आर्थिकभार कम परोस् भनेर क्रमिक रूपमा उपकरण जडान गर्ने नीति लिइएको जोशीले बताए ।

उपकरण जडान भएपछि प्रदूषण नियन्त्रण गर्न सजिलो हुने विभागको विश्वास छ । एउटा उपकरण जडान गर्न २० देखि २५ लाखसम्म खर्च हुने गरेको छ ।

सबैभन्दा हानिकारक २ दशमलव ५ पिएम
प्रदूषण मापन केन्द्रले दुई किसिमले मापन गर्दै आएको छ । एउटा २ दशमलव ५ पार्टिकुलर म्याटर ९पिएम० मा अधिकतम ४० माइक्रोग्राम र अर्को १० पिएममा अधिकतम एक सय २० माइक्रोग्राम प्रतिघनमिटर हुनुपर्ने व्यवस्था छ । २ दशमलव ५ पिएम सबैभन्दा हानिकारक हुन्छ । यसले स–साना धूलो, धुवाँका कणलाई मापन गर्छ । यस्ता कण फोक्सो हुँदै रगतसम्म पुग्ने विज्ञहरूले बताएका छन् ।

उपत्यकाबाहिर धेरै प्रदूषण
केन्द्रका अनुसार सबैभन्दा धेरै प्रदूषण उपत्यकाबाहिर देखाएको छ । सौराह र लुम्बिनीमा राखिएका उपकरणले सबैभन्दा धेरै प्रदूषण देखाएका हुन् । काठमाडौंको रत्नपार्कमा राखिएको उपकरणले प्रदूषण तेस्रो स्थानमा देखाएको छ ।