शेखर कोइरालाकाे दाबीः फौजदारी मुद्दा लागेकालाई राजनीतिक मुद्दा भनेर छुट दिँदा देशको छवि बदनाम भयो

काठमाडौं । भ्रष्टाचारमा शून्य सहनशिलता नअपनाए नेपाली कांग्रेसको औचित्य सखाप हुने नेपाली कांग्रेसका नेता शेखर कोइरालाले दाबी गरेका छन् ।

आज मंगलबार काठमाडौंमा आयोजित वर्तमान राजनीतिक चुनौतिहरू र नेपाली कांग्रेसको दायित्व विषयक विचार गोष्ठीमा बोल्दै उनले देशमा भ्रष्टाचारले चारैतिरबाट जडा गाडेको बताए ।

जता त्यतै भ्रष्टाचार भएको देखिने भन्दै भ्रष्टाचारमा शून्य सहनशिलता अपनाउनुपर्ने उनको भनाई छ । उनले राज्यले नै दण्डहिनतालाई बढाउने प्रयास गरिराखेको तर्क गरे । उनले फौजदारी मुद्दा लागेका व्यक्तिलाई राजनीतिक मुद्दा भनेर छुट दिन लागिएको भन्दै यस्ता कुराले देशको छवि अन्तर्राष्ट्रिय स्तरमा बदनाम गराउने बताए ।

उनले भूटानी शरणार्थीको कुरा गर्दा त अन्तर्राष्ट्रिय समुदायमा हामीहरूले आफ्नो अनुहार कसरी देखाउने भन्ने प्रश्न खडा भएको बताए । ‘ यो कुराहरूलाई शून्य सहनशिलताको रुप लिएर नेपाली कांग्रेस यो केन्द्रीय समितिपछि पक्कैपनि हामीहरू अगाडी बढ्छौँ भन्नेकुरा तपाईहरूको माझ राख्न चाहन्छु’, उनले भने।