शेयर बजार परिसूचक ५२ अंकले घट्यो

काठमाडौं, चैत १२ – शेयरबजार परिसूचक नेप्से सोमबार पनि उच्च दरले घटेको छ ।

सोमबार एकैदिन नेप्से ५१ दशमलव ८९ बिन्दूले घटेर ११ सय ६८ दशमलव ५५ अङ्कमा ओर्लिएको हो । सोमबार बजार खुले लगत्तै घट्न थालेको नेप्से ४० मिनेटमा ३ प्रतिशत भन्दा बढी घटेपछि सर्किट ब्रेक लागेर १५ मिनेटका लागि कारोबार रोकिएको थियो ।

फेरि खुलेको बजारमा पनि कम्पनीहरूको मूल्यमा लगातार गिरावट आएपछि नेप्से उच्च बिन्दूले तल ओर्लिएको हो । सोमबार १ सय ५७ ओटा कम्पनीको सयेर किनबेच भएकोमा दुईओटा बाहेक अरु सबै कम्पनीको सेयर मूल्य घटेको छ । आज १३ वटा कम्पनीको शेयर मूल्य १० प्रतिशतको हाराहारीमा घटेको छ । १ सय ५७ कम्पनीको ४७ करोड ३३ लाख ९५ हजार रुपैयाँको कारोबार भएको छ ।

यसअघि २०७२ साल पुस ३० गते नेप्से ११ सय ९० बिन्दुमा थियो । सोमबार दुई वर्षअघिको भन्दा पनि तलको बिन्दुमा पुगेको हो । कारोबार सुरु भएको १ घन्टामा नेप्सेमा ३ प्रतिशतभन्दा बढीको घटबढ भएमा सर्किट ब्रेक लगाएर कारोबार रोक्ने गरिन्छ ।

नयाँ सरकार गठन भएदेखि नेप्से लगातारजसो घटिरहेको छ । अर्थमन्त्री डाक्टर युवराज खतिवडाले विराटनगरमा कम्पनीहरूको वित्तीय अवस्था बुझेरमात्रै सेयरमा लगानी गर्न आग्रह गर्नुभएको थियो ।

लगानीकर्ता अर्थमन्त्रीको सुझावलाई नकारात्मक रूपमा बुझ्दा सोमबार बजार सर्किट ब्रेक लाग्ने गरी घटेको विष्लेषण गरिएको छ ।