संविधान संशोधनको माग बोकेर राजपाका नेताहरु बालुवाटार

काठमाडौं । प्रधानमन्त्री केपी शर्मा ओलीले तराईको समग्र विकासका वृहत योजना बनाउने प्रस्ताव गरेका छन् । राजपाका नेताहरु सँग हिजो साँझ बालुवटारमा भएको भेटमा प्रधानमन्त्रीको तराईको विकास, चुरे संरक्षणको ठोस कदम, तटबन्धन, उद्योग स्थापना आदिका लागि वृहत योजना बनाउन प्रस्ताव छ ।

राजपाका अध्यक्ष मण्डलका सदस्य महन्थ ठाकुरले प्रधानमन्त्री ओलीलाई ज्ञापन पत्र बुझाएका छन् । प्रधानमन्त्रीले ज्ञापन पत्र हेरेपछि राजपाले पहिला उठाएका कतिपय माग असान्दर्भिक भइसकेको प्रतिक्रिया दिए । “हिजोका कतिपय माग आज असान्दर्भिक भइसकेका छन् । त्यसमा तपाईंहरुले पनि पुनविचार गर्नुहोस्” प्रधानमन्त्री ओलीले भने, “संविधानमा देखिएका त्रुटीहरुमा छलफल गरौं तर यसैमा अल्झिएर नबसौं । देश विकासमा लागौं ।”

प्रधानमन्त्रीले तराईको विकासका लागि मानसिकता पनि परिवर्तन गर्नुपर्ने बताए ।
सुगम ठाउँ भएर पनि न्यून साक्षरता दर, विभिन्न सामााजिक विकृतिबाट तराइका जनतालाई मुक्त पार्नुपर्नेमा प्रधानमन्त्रीको जोड छ । “यी सबै समस्या समाधानका लागि राजनीतिक रुपमा योजना बनाऔं र कार्यान्वयन गरौं” प्रमले भने ।

राजपामा नेताहरुले तराइको बाढी, दुईबर्ष अघिको आन्दोलनका घाइतेको अवस्था र मुद्दा, तराइको विकास, मधेस र थारु आन्दोलनको छानविनका लागि बनेको आयोगको प्रतिवेदन र संविधान ससोधनका बिषयमा प्रधानमन्त्रीसँग छलफल गरेका थिए ।

छलफलमा नेताहरु मह्न्थ ठाकुर, राजेन्द्र महतो, शरदसिंह भण्डारी, महेन्द्र राययादव, राजकिशोर यादव, केशव झा बालुवटार पुगेका थिए ।