सात घण्टासम्म थुनिएको बडीगाड बल्ल बग्न थाल्यो

काठमाडौं, ३० भदौ । बागलुङको बडीगाड र ढोरपाटन नगरपालिकाको सीमाक्षेत्र तुरतुरे भीरबाट ठूलो पहिरो खस्दा ७ घण्टादेखि थुनिएको बडीगाड खोला बल्ल बग्न थालेको छ । शुक्रबार मध्यराति मध्यपहाडी लोकमार्ग माथिबाट ठूला चट्टानसहित खसेको पहिरोले बडिगाड खोलो थुनिएको थियो ।

पहिराले खोला थुनिएपछि जमेको पानीले खोलाको माथिसम्म ठूलो ताल बनिसकेको छ । तालको पानी बिस्तारै ओभर फ्लो भएर बग्न थालेको इलाका प्रशासन कार्यालय बुर्तिबाङका प्रमुख जनक थापाले बताएका छन् ।

खोला थुनिएपछि ढोरपाटन नगरपालिका २ सिमलचौरका चार घर डुबानमा परेका छन् । खोला थुनिदा दुई किलोमिटर माथिसम्म पानीको ताल फैलिएको छ । जमेको पानी बग्न थालेसँगै फैलिदो क्रममा रहेको तालको पानी दुई फिट घटेको थापाले जानकारी दिए ।

पहिरो खस्दा मध्यपहाडी लोकमार्गसमेत अवरुद्ध भएको छ । अवरुद्ध सडक खुलाउन करीव १ साता लाग्ने देखिएको प्रमुख जिल्ला अधिकारी बेदप्रसाद खरेलले बताए । थुनिएको खोला बिस्तारै आफ्नो बहावमा आउन थालेकाले ठूलो जोखिम टरेको उनले बताए ।

ठूला ढुङ्गासहित खोला थुनिएकाले फुट्ने सम्भावना नभए पनि तल्लो तटीय क्षेत्र भीमगिठे, खाल, खार लगायतका बासिन्दालाई विशेष सतर्कता अपनाउन जिल्ला प्रशासन कार्यालयले आग्रह गरेको छ । पहिरो खसेर ताल बनेको क्षेत्रमा बाग्लुङ सदरमुकामबाट प्रमुख जिल्ला अधिकारी बेदप्रसाद खरेलसहितको टोली बिहानै पुगिसकेको थियो ।