सिम्रिक एयर दुर्घटना अपडेट : घाइते भएका एक जनाको निधन

काठमाडौं । संखुवासभामा आज भएको सिम्रिक एयरको हेलिकोप्टर दुर्घटनामा घाइतेमध्ये एक जनाको ज्यान गएको छ ।

पाइलट सुरेन्द्र पौडेल र स्थानीय भविन गुरुङसहित ३ जना गम्भीर घाइते भएकोमा स्थानीय गुरुङको उपचारका क्रममा काठमाडौंतफै लैजाँदै गर्दा मृत्यु भएको प्रहरी स्रोतले जानकारी दिएको छ ।

गुरुङ अरुण जलविद्युत् आयोजनाका कर्मचारी रहेको प्रहरीले जनाएको छ । जिल्ला प्रहरी कार्यालय संखुवासभाले दुर्घटनामा घाइते भएका पाइलट पौडेलसहित तीनजनालाई उपचारका लागि काठमाडौैं पठाइएकोमा गुरुङको मृत्यु भएको खबर प्राप्त भएको जानकारी दिएको छ ।

सिम्रिक एयरको हेलिकोप्टर बिहीबार काठमाडौंबाट संखुवासभा गएको थियो । बिहीबार संखुवासभामै पार्क भएको उक्त हेलिकोप्टर आज अपर अरुण जलविद्युत् आयोजनाको सामग्री बोकेर निर्माणस्थल जाँदै थियो । हेलिकोप्टर दिउँसो १ बजेबाट एयर ट्राफिकसँग सम्पर्क टुटेको थियो । त्यसको केही समयपछि भोटखोला गाउँपालिका ४ सिब्रुङमा दुर्घटनामा परेको थियो ।