स्मरणशक्ति दोब्बर बनाउने अचम्मको च्याउ !

दक्षिण अफ्रिकामा पाइने एक प्रकारको च्याउलाई प्रयोग गर्न प्रतिबन्ध लगाइएको छ । यो च्याउ सेवन गरेपछि मानिस तथा जनावरलाई एक प्रकारको अनौठो शक्ति प्राप्त हुने भएकाले यस्तो प्रतिबन्ध लगाइएको हो । वैज्ञानिक नाम ‘सिलोसिव क्युवेन्सीस’ भनिने यो च्याउ ‘साइकेडेलिक’ प्रजातिमा पर्ने वैज्ञानिकहरुले बताएका छन् । यस्तो च्याउमा मस्तिष्कलाई अत्यन्तै सक्रिय गर्ने तत्वहरु पाइने उनीहरुले बताएका छन् । दक्षिण अफ्रिकामा यस च्याउलाई युवाहरुले लागुपदार्थकोरुपमा दुरुपयोग गर्न थालेपछि टिप्न, बेच्न र सेवन गर्न प्रतिबन्ध लगाइएको छ ।

तर स्थानीय अभियन्ता मोनिका क्रामहुटले यो च्याउको सेवनले उनलाई ज्योतिष विद्या सिक्न सहयोग भएको बताएकी छिन् । स्थानीय बासिन्दाले च्याउबारे गरेका मिथकहरु साँचो भएको र ती च्याउमा मस्तिष्कको क्रियाशीलतालाई अद्वितीय ढंगले बढाइदिने तत्वहरु पाइने वैज्ञानिकहरुले उल्लेख गरेका छन् । वैज्ञानिकहरुले यस च्याउबारे विभिन्न प्रयोगशाला, मानिस र जनावारहरुमा परीक्षणसमेत गरिसकेका छन् । यसमा पाइने तत्वले मति भ्रम गर्ने, उत्साह र कल्पना नै गर्न नसकिने लक्षणहरु देखापर्दछन् । अर्थात् हामीले गर्ने कल्पना, बौद्धिकता, स्मरणशक्तिको क्षमता दोब्बर बनाइदिन्छ ।

सन् २०१४ मा किंग्स कलेज अफ लन्डनका १६ जना वैज्ञानिकहरुले गरेको अध्ययनअनुसार यस च्याउको सेवन गरेपछि मस्तिष्कले गर्ने कार्यलाई सपनामा मानिसले देखेको कल्पनासँग तुलना गरिएको छ । वैज्ञानिकहरुले यस च्याउको सेवनले मानिसहरुलाई फाइदा गर्ने बताएका छन् । उनीहरुकाअनुसार विशेषगरी मनोवैज्ञानिक समस्या भएका मानिसहरुलाई औषधिकोरुपमा प्रयोग गर्न सकिन्छ । सन् २०१३ मा गरिएको एक अध्ययनअनुसार यस च्याउको सेवनले मानिसहरुले सजिलै आफ्नो डरलाई नियन्त्रण गर्नसक्ने उल्लेख गरिएको छ । यस च्याउलाई ती अध्ययनकर्ताहरुले डर भगाउने च्याउको रुपमा प्रस्तुत गरेका छन् । ‘इन्टरनेसनल जर्नल अफ मेडिसिनल मसरुम’ले सन् २००५ मा गरेको अध्ययनमा विश्वभर कम्तीमा पनि १४४ थरिका च्याउमा यस्तो अद्वितीय क्षमता रहेको उल्लेख गरेको छ । त्यसमध्ये कमैमात्र पाइने दुर्लभ र धेरै शक्ति भएको दक्षिण अफ्रिकामा चार थरिका रहेको उल्लेख गरिएको छ ।

(https://punandjokes.com/)