हवाई सेवा सञ्चालनका लागि उपमहानगरपालिकाको यस्तो निर्णय

दाङ, १६ पुस । हवाईजहाज सेवा सञ्चालनका लागि उपमहानगरपालिकाले निर्णय गर्नुपर्छ ? नपत्याए तुलसीपुर उपमहानगर कार्यपालिकाको आज बसेको बैठकले गरेका निर्णयहरु हेरे हुन्छ ।
दाङको टरिगाउँ विमानस्थल र हवाई सेवा सञ्चालन गर्न तुलसीपुर उपमहानगरपालिकाले तत्कालका लागि नेपालगन्जबाट इन्धन ल्याउने निर्णय गरेको छ । टरिगाउँ एयरपोर्टमा विमानसेवा सञ्चालनका लागि पहलकदमी लिएको उपमहानगरले इन्धनका बारेमा यस्तो निर्णय गरेसँगै विमान सेवा सञ्चालनका लागि वाटो खुलेको छ । दाङवासी र आसपासका जिल्लावासीहरुको हवाईसेवा सञ्चालनका लागि देखिएको चासो र मागलाई दृष्टिगत गरी उपमहानगरपालिकाले यस्तो निर्णय गर्नुपरेको हो ।

अब तुलसीपुरदेखि काठमाडौसम्म सिधै हवाइ सेवा सञ्चालन हुनेछ । यसैगरी इन्धन डिपो सञ्चालन गर्नका लागि उपयुक्त जग्गाको खोजी गर्न कार्यपालिकाको बैठकले उपसमिति समेत बनाएको प्रवक्ता श्याम डाँगीले बताए । उनले तत्कालका लागि सातामा दुईपटक विमान सेवा सञ्चालन गर्ने निर्णय गरेको समेत बताए ।

इन्धन डिपो सञ्चालनका लागि वैठकले ९ सदस्यीय उपसमिति पनि बनाएको छ । समितिका सदस्यहरुमा वडाध्यक्षहरु सूर्यवहादुर डाँगी, नवराज लामिछाने, टोपबहादुर केसी, कुमार लामिछाने, घनश्याम ढकाल, तुलसीपुर उद्योग वाणिज्य संघका अध्यक्ष वीरवहादुर रावत, तुलसीपुर नगरविकास समितिका अध्यक्ष यज्ञवहादुर केसी, नगरपालिकाका इन्जिनियर पवन योगी रहेका छन् । समितिलाई दुई हप्ताभित्र प्रतिवेदन पेस गर्ने समय दिइएको छ ।

यसैगरी टरिगाउँ विमानस्थलको धावनमार्ग साँघुरो भएकाले ठूला जहाजको उडान भर्नका लागि एयरपोर्ट विस्तारको विकल्पको खोजी गर्ने निर्णय गरेको पनि प्रवक्ता डाँगीले बताए । राप्तीलाई पर्यटकको हबका रुपमा विकास गर्न सकेमा विमान सञ्चालनको केन्द्रका रुपमा टरिगाउँ विमानस्थल रहने भएकाले पर्यटकीय विकासका लागि पहल गर्ने निर्णय समेत कार्यपालिकाको बैठकले गरेको छ । पञ्चायतकालमै हवाईसेवा शुरु भएको दाङको टरिगाउँ विमानस्थलमा इन्धनकै अभावका कारण वर्षौंदेखि हवाई सेवा बन्द रहेको छ ।