हिउँ परेपछि किसान खुसी

काठमाडौं । चिसो बढेसँगै उच्च पहाडी भेगमा हिमपात शुरु भएको छ । हिउँ परेपछि किसान भने खुसी भएका छन् ।

केही दिनयता मौसममा आएको परिवर्तनका कारण डोटीका उच्च लेकाली क्षेत्रमा हिमपात भएको हो । हिउँ परेका कारण लगाएको बालीमा पर्याप्त मात्रामा पानी पुग्ने भन्दै लेकाली क्षेत्रमा बसोबास गर्ने किसान भने खुशी भएका छन् । हिमपात भएसँगै चिसो बढेपछि पहाडी जनजीवन प्रभावित भएको छ ।

डोटीको खप्तडस्थित झिगराना, गोलादेउ, पानीखाल, नापानी, शिखर, गोवडालेकलगायत उच्च पहाडी क्षेत्रमा हिमपात भइ चिसो बढेकाले गाईवस्तु चराउन समस्या भएको स्थानीयले बताएका छन् । गाईवस्तु चर्ने ठाउँ पूरै हिउँले ढाकेकाले तिनलाई गोठ बाहिर निकाल्नसमेत समस्या भएको छ ।

उच्च लेकाली भेगमा अहिले पनि हिमपात भइरहेको छ । हिमपातका कारण स्थानीयवासी घर बाहिर निस्किन नसकेकाले घरभित्रै आगो तापेर बसेका स्थानीयले बताएका छन् । हिउँ परेपछि किसान खुसी भएपनि वृद्धवृद्धा, बालबालिकालाई चिसोबाट जोगिन कठिन भएको छ ।