१५ वर्षीया बालिकालाई बलात्कार गरेका अभियुक्त कोइराला जेल चलान, श्रेष्ठ र सुवाल जमानीमा छुटे

काठमाडौं । १५ वर्षीया बालिकालाई बलात्कार गरेका कास्कीका अभियुक्त ४९ वर्षीय सुदनबहादुर कोइरालालाई जेल चलान गरिएको छ
।
काठमाडौंको ठमेलस्थित लर्ड अफ ड्रिंग्स (एलओडी) क्लबबाट लगेर नाबालिगलाई बलात्कार गरेको आरोपमा पक्राउ परेका कोइरालालाई जिल्ला अदालत ललितपुरका न्यायाधीश पुष्पराज थपलियाको आदेशअनुसार पुर्पक्षका लागि थुनामा राखिएको हो ।

गत जेठ ३१ गते ठमेलस्थित एलओडीमा पसेकी १५ वर्षीया किशोरी मदिराले मातिएको अवस्थामा कोइरालाले उनलाई सानेपास्थित कार्यालयको कोठामा लगेर बलात्कार गरेको आरोप लागेको थियो ।
उनलाई प्रहरीले पक्राउ गरेर जबरजस्ती करणीमा मुद्दा चलाएको थियो ।

त्यस्तै, ती नाबालिगलाई एलओडीमा प्रवेश गर्न दिएपछि पक्राउ परेका सञ्चालकहरु रुदिलबल्लभ श्रेष्ठ र राजुसिंह सुवाल हाजिरी जमानीमा छुटेका छन् । उनीहरुलाई जिल्ला सरकारी वकिल कार्यालय काठमाडौंको अनुमतिमा हाजिरी जमानीमा छाडिएको स्रोतले जनाएको ।