प्रदेश तथा प्रतिनिधिसभाको पहिलो चरण निर्वाचनमा ६५ प्रतिशत मतदान भएकाे निर्वाचन आयोगले जनाएको छ ।
मतदान सकिएलगत्तै अायाेग केन्द्रीय कार्यालयमा अायाेजना गरिएकाे पत्रकार सम्मेलनमा प्रमुख निर्वाचन अायुक्त डा. अयाेधिप्रसाद यादवले ६५ प्रतिशत मतदान भएकाे प्रारम्भिक जानकारी प्राप्त भएको बताए ।
उनले अाइतबार ३२ वटा जिल्लामा निर्वाचन शान्तिपूर्ण र उत्साहपूर्ण रूपमा मतदान सम्पन्न भएको जानकारी दिँदै मतपेटिका जिलला सदरमुकाममा ल्याउने काम भइरहेको बताए ।
अर्को चरणको निर्वाचन नभएसम्म शिलबन्दी गरी मतपेटिका सुरक्षित रूपमा राखिने अायोगले जनाएको छ । मतपत्रले भरिएका अधिकांश स्थानका मतपेटिका अाजै जिल्ला सदरमुकाम ल्याइने डा. यादवले बताए ।
उच्च हिमाली र विकटक्षेत्रका मतपेटिका भने सोमबार हेलिकोप्टरबाट सदरमुकाम ल्याइनेछ । उच्च पहाडी र हिमाली ३२ जिल्लामा आज पहिलो चरणको निर्वाचन भएको हो भने बाँकी ४५ जिल्लामा मंसिर २१ गते निर्वाचन हुँदैछ ।
सबैभन्दा बढी मतदान बाजुरामा
निर्वाचन अायाेगले अाइतबार मतदान भएका ३२ जिल्लामध्ये सबैभन्दा बढी बाजुरामा मत खसेकाे जनाएकाे छ । बाजुरामा ८० प्रतिशत मतदान भएकाे अायाेगकाे भनाइ छ ।
रुकुमका दुईवटा मतदान केन्द्रमा भने पुनः मतदान गरिने भएको छ । मतदानको क्रममा एसिड हालेर केही मतपत्र जलाइएकाले पुनः मतदान गरिने निर्वाचन आयोगले जानकारी दिएको छ ।
रुकुम पश्चिमको बाँचीकोट गाउँपालिका–५ स्थित रत्ना निमावि मतदान केन्द्र र आठबीसकोट नगरपालिका–१२ गत्तासैना मतदान केन्द्रमा पुनःमतदान गरिने रुकुम पश्चिमका मुख्य निर्वाचन अधिकृत काजीबहादुर राईले जानकारी दिए ।
दुवै मतदान केन्द्रको मतपेटिकामा एसिड राख्ने मान्छेको पहिचान हुन नसकेको र उनीहरूको खोजीकार्य जारी रहेको रुकुम पश्चिमका प्रहरी नायव उपरीक्षक राजेन्द्र धमलाले जानकारी बताए । रत्ना निमाविमा २५० र गत्तासैनामा ३६५ मत खसेपछि मतपत्र जलाइएकाले मतदान स्थगित भएको थियो ।
यी दुई मतदान केन्द्रमा आगामी मंसिर २१ गते मतदान गरिने उनले बताए । रत्ना निमाविको मतदान केन्द्रमा प्रतिनिधिसभाको र गत्तासैना मतदान केन्द्रमा समानुपातिकतर्फको मात्र मतदान हुने उनले बताए ।
प्रतिक्रिया