३३ महिनादेखि प्रहरी आफैं अुसरक्षित

लमजुङ, माघ ५ । प्रहरी नै असुरक्षित छ भन्दा सबैलाई अचम्म लाग्न सक्छ, तर यो साँचो हो । प्रहरी जवान ड्युटीमा उभिरहेको ठाउँ नजिकैको त्रिपालमुनि नै दिन र रात बिताउँछन् दूधपोखरी गाउँपालिकाको बिचौरका प्रहरी जवानहरु ।

१४ जना प्रहरीहरु यही त्रिपालमुनि रात बिताएको पनि ३३ महिना पुगेछ । उनिहरु भन्छन्, ‘रातमा आन्नद अनि सुरक्षित भएर सुत्न पनि पाएका छैनौं ।’

भाडामा बस्दै आएका यहाँको प्रहरी कार्यालय २०७२ बैशाख १२ गते गएको बिनाशकारी भुकम्पबाट चर्किएर जोखिमयुक्त बनेको छ । बस्दै आएका भवन बस्न नमिलेपछि जिल्ला प्रहरी कार्यालय लमजुङले प्रहरी जवानका लागि त्रिपाल पठाएपछि उनिहरु यही त्रिपालको भरमा बस्दै आएका छन् ।

भुकम्प गएको ३३ महिना बितिसक्दा पनि आफूहरुले राम्रो बास पाउन नसकेको ईलाका प्रहरी कार्यालय बिचौरका सही केशव बहादुर क्षेत्री बताउँछन् । ‘साँझ बिहान पर्ने तुसारोले त्रिपाल सेताम्मे हुन्छ । अनि शीत चुइन्छ ।’ उनले भने, ‘ पानी पर्दा त निथ्रुक्कै भइन्छ । बर्खा र जाडो यसैगरी कटाउन बाध्य छौं ।’

जनतको सेवामा दिन रात खटिने प्रहरी त्रिपालमुनि कालो रात गुजार्दा उनिहरु आफूहरुलाई असुरक्षित महशुस भएको बताउँछन् ।

ईलाका प्रहरी कार्यालय बिचौरको नयाँ भवन पनि नबनेको भने होइन् । सम्झौता अनुसारको भवन नबनेको भन्दै उनिहरुलाई नयाँ भवनमा बस्न दिइएको छैन् । ठेकेदारको लापरबाहीका कारण गलत डिजाइन र कमजोर भवन भएका कारण प्रहरीलाई नयाँ भवनमा बस्न नदिएको बताइर्एको छ । ठेकेदार कम्पनी जेएसआर निभा जेभी पोखराले भवनको ठेक्का पाएको थियो ।

त्रिपालको चौघेरोमा बस्दै आएका उनिहरुलाई सुबिधा सम्पन्न भवनमा कहिले बस्न पाउने हो भन्ने चासो पनि उत्तिकै छ । जिल्ला प्रहरी कार्यालय लमजुङको पटक पटकको ताकेतापछि नयाँ भवनको माथिल्लो तल्ला र चर्किएको ठाउँमा मर्मत सम्भार गरिएको छ । १२ असार २०७० मा सम्झौता भएको भवन सम्झौता अनुसार ९ चैत्र २०७० मा निर्माण भईसक्नुपर्ने प्रहरी नायव उपरिक्षक पदम बहादुर बिष्टले बताए ।

शान्ति तथा पुननिर्माण मन्त्रालय र दातृ निकायको सहयोगमा एककरोड ८ लाख ६५ हजार २ सय २६ रुपैयाँमा उक्त भवन निर्माण गरिएको थियो । छिमेकी जिल्ला गोरखासँग सिमाना जोडिएको पूर्वी लमजुङको विकट साविकको बिचौर, ईलमपोखरी र दुधपोखरी कार्यक्षेत्र रहेको सो प्रहरी कार्यालय ‘क’ श्रेणीको ईलाका प्रहरी कार्यालय हो ।