​राजनीतिक स्थिरता नचाहनेहरु अस्थिरता फैलाउन खोज्दैछन् : गृहमन्त्री थापा

काठमाडौं,  १७ साउन । गृहमन्त्री रामबहादुर थापा बादलले राजनीतिक अस्थिरता फैलाउने उद्देश्यले सांसदमाथि धम्की दिइएको बताएका छन् । केही दिनअघि नेकपाका सांसद निरु पाललाई धम्की दिएको घटनाबारे बोल्दै गृहमन्त्री थापाले यस्तो बताएका हुन् । सांसद पालले केही दिनअघि आफूलाई पेस्तोल देखाएर धम्की दिएको बताएकी थिइन् ।

उक्त सन्दर्भमा संसदमा सांसदहरुले उठाएको प्रश्नको जवाफ दिँदै गृहमन्त्री बादलले भने, ‘उक्त घटना राजनीति प्रकृतिको देखियो । अहिले पनि विभिन्न मुद्दा उठाएर राजनीतिक अस्थिरता फैलाउन खेल भइरहेको छ ।’ गृहमन्त्री थापाले भने, ‘अहिले देश विकास र समृद्धिको दिशामा अघि बढिरहेको छ । राजनीतिक स्थायीत्व कायम भएको छ । उनले राजनीतिक स्थिरता नचाहनेहरुले अस्थिरता फैलाउन खोजेका पनि बताए । अहिले पनि देशमा धार्मिक, साम्प्रदायिक, जातीय, क्षेत्रीय घटना उठाएर र त्यसलाई अतिरञ्जित गरेर राजनीतिक अस्थिरता फैलाउने काम भइरहेको भन्दै गृहमन्त्री थापाले सरकार यसतर्फ सचेत रहेको बताए ।