पप्पु कन्स्ट्रक्सनसँग भ्रष्टाचार मुद्दामा मुछिएका कर्मचारी यादव १८ लाख रुपैयाँ धरौटीमा छुटे

काठमाडौं । निर्माण कम्पनी पप्पु कन्स्ट्रक्सनसँग भ्रष्टाचार मुद्दामा मुछिएका सडक डिभिजन सडक कार्यालय नेपालगन्जका तत्कालीन प्रमुख राजेशकुमार यादव १८ लाख रुपैयाँ धरौटी बुझाएर तारेखमा छुटेका छन् ।

विशेष अदालतका न्यायाधीशहरु बाबुराम रेग्मी, रत्नबहादुर बागचन्द, प्रमोदकुमार श्रेष्ठ वैद्यको इजलासले धरौटीमा छाड्ने आदेश गरेपछि उनले रकम बुझाएका थिए ।

विशेष अदालतले मागेको १८ लाख रुपैयाँ बैंक ग्यारेन्टी धरौटी देखाएर सोमबार तारेखमा छुटेका हुन् । अख्तियार दुरुपयोग आयोगले पप्पु कन्स्ट्रक्सनसँगको मिलेमतो गरी भ्रष्टाचार गरेको आरोपमा उनीसहित मुद्दा दर्ता गरेको थियो । यादवलाई ३ करोड ८८ लाख ७२ हजार बिगो माग दाबी गर्दै अख्तियारले मुद्दा दर्ता गरेको थियो ।

अख्तियारका अनुसार प्रारम्भिक चरणदेखि अन्तिम चरणसम्मको अवस्थालाई हेर्दा निर्माण अवधिमा संलग्न सबै प्राविधिक कर्मचारीहरुसमेत मिलेर लाईन लेभल तथा पियर हाईटको सम्बन्धमा गम्भीर लार्पवाही भएको आरोप पत्रमा उल्लेख छ ।

अख्तियारले पप्पु कन्स्ट्रक्सनका अध्यक्ष सुमित रौनियार र तत्कालीन अध्यक्ष तथा निलम्बित सांसद हरिनारायण रौनियारलगायत १२ जना विरुद्ध विशेष अदालतमा मुद्दा दर्ता गरेको थियो ।
निर्माण सामाग्रीहरुको गुणस्तरहीन सामग्री लोड लिन नसकी पुल भास्सिएको तथ्य प्रविधिक परीक्षण तथा विश्लेषणबाटसमेत पुष्टी हुन आएको अख्तियारले मुद्दामा उल्लेख गरेको छ ।