मध्यपहाडी लोकमार्ग पोखरा-बागलुङ सडक साढे ६ घण्टा बन्द हुने

काठमाडौं । पोखरा बागलुङ सडकखण्ड अन्तर्गत पर्ने बन्दै गरेको मध्यपहाडी लोकमार्ग दैनिक साढे छ घण्टा बन्द हुने भएको छ ।

सडक विस्तारका लागि पर्वत र कास्कीको सिमाना नयाँ पुलदेखि कुश्मा अर्मादीसम्मको खण्डमा आज बुधबारदेखि दैनिक साढे छ घण्टा बन्द गर्ने निर्णय भएको हो ।

बिहान १० बजेदेखि दिउसो साढे २ बजेसम्म, दिउसो साढे ४ बजेदेखि ७ बजेसम्म सडक बन्द गर्ने निर्णय गरिएको पर्वतका प्रमुख जिल्ला अधिकारी गुरुदत्त ढकालले बताएका छन् ।

लोकमार्गको डिमुवादेखि बेतनी बीचको माहुरी भिर, चुवाको भिर र अर्मादीको भिरमा सडक फराकिलो बनाउने काम भैरहेको छ । मध्यपहाडी सडक निर्माण आयोजनाअन्तर्गत सडक बनाउने काम तीव्र भैरहेको छ ।

महभीर, चुवा र अर्मादीको भिरमा सडक फराकिलो बनाउन पहरा कटान गर्नुपर्ने भएकाले दैनिक साढे छ घण्टा सडक बन्द गर्ने निर्णय गरिएको बताइएको छ ।