निर्भया सामूहिक बलात्कारमा संलग्न चारै जनालाई मृत्युदण्ड

नयाँ दिल्ली।  निर्भया बलात्कारका दोषीलाई आज सुर्योदय अगावै फाँसी दिइएको छ । भारतीय समय अनुसार विहान साँढे पाँच बजे चारै जना दोषीलाई दिल्लीस्थित तिहार जेलमा फाँसी दिइएको हो ।

फाँसी दिइएकामा मुकेश सिंह ३२ वर्ष, अक्षय ठाकुर ३१ वर्ष, पवन गुप्ता २५ वर्ष र विनय शर्मा २६ वर्षीका छन् । फाँसी पवन जल्लादले लिभर तानेर दिएका थिए । उनी मंगलबार नै उत्तर प्रदेशको मेरटबाट तिहार जेल पुगेका थिए ।

तिहार जेलमा पहिलोपटक एकैपटक चारजनालाई फाँसी दिइएको हो । टाइम्स अफ इन्डियाका अनुसार पवन जल्लादले फाँसीको पूर्वाभ्यास गरिसकेका थिए । जेलका सुपरिटेन्डेन्टले झुण्ड्याउने डोरीको परीक्षण गरी झुण्ड्याउने फाँसीको तख्ताको समेत नीरिक्षण गरेका थिए ।

दिल्ली जेल ऐन २०१८ अनुसार फाँसी दिइँदा जेल सुपरिटेन्डेन्ट, डेपुटी सुपरिटेन्डेन्ट, मेडिकल अफिसर, डिस्ट्रिक मेजिस्ट्रेटको उपस्थिति थियो । गार्ड, वार्डर सहित हतियारधारी गार्ड समेत उपस्थित थियो ।

फाँसी दिइएका चारैजनाका परिवार भने उपस्थित थिएनन् । तिहार जेलका सबै कैदीबन्दी जेल परिसरभित्रको कोठा बाहिर समेत आउन दिइएको थिएन । उनीहरुलाई यसै हप्ताभित्र परिवारसँग भेट्न दिइएको थियो । अक्षय ठाकुरबाहेकका परिवारका सदस्य भेट्न पुगेका थिए । भेटमा उनीहरुको रुवावासी चलेको जेल स्रोतलाई उल्लेख गर्दै भारतीय सञ्चारमाध्यमले जनाएका छन् । २९ फेब्रुअरीमा पवन गुप्ता र विनय शर्माको परिवार जेलमा पुगेका थिए । उनीहरु परिवारसँग भेट्दा खुबै रोएका थिए । शर्मालाई जेलका अधिकारीहरुले सम्झाउनुपरेको थियो । अनियन्त्रित तरिकाले शर्मा रोएको उल्लेख गरिएको छ ।

२ मार्चको परिवारसँगको भेटमा मुकेश सिंह बढी समय शान्त देखिन्थे । तर, उन बेला बेलामा भावुक भई रोएका थिए । उनी बारम्बार कानुनी विकल्प रहेको र फाँसीबाट बच्ने बताइरहेको टाइम्स अफ इन्डियाले जनाएको छ ।

घटनामा छ जना दोषी पाइएपछि उनीहरुमध्येका एक राम सिंहले सन् २०१३ मा तिहार जेलमा आत्महत्या गरिसकेका छन् । अर्का दोषी कम उमेरका पाइएकाले कानुनबमोजिम तीन वर्ष सुधारगृहमा राखेपछि रिहा भइसकेका छन् ।

दोषीमध्य विहार घर भएका अक्षय ठाकुरको परिवार भने जेलमा पुगेनन् । उनकी पत्नी पुनिता देवीले पारपाचुकेको निवेदन अदालतमा दर्ता गरेकी छिन् । यसलाई बहाना बनाएर भएपनि फाँसी स्थगित गराउन खोजिएको थियो । तर, अदालतले यसपटक अस्वीकार गरिदियो ।