ताप्लेजुङ दुर्घटना अपडेटः घाइते दुई जनालाई उपचार गर्न काठमाडौं लगियो

२३ असोज, ताप्लेजुङ । पाथिभरा दर्शनका लागि गएका तीर्थयात्री चढेको जीप दुर्घटनामा घाइते भएका दुई जनालाई थप उपचारका लागि काठमाडौं लगिएको छ ।

जिल्ला अस्पताल ताप्लेजुङमा उपचार हुन नसकेपछि उर्लाबारी मोरङका २६ वर्षीय दिलिप घिमिरे र २० वर्षीय अनिलजंग थापालाई हेलिकोप्टरबाट काठमाडौं लगिएको हो ।

दिलिप अनिलजंगका भिनाजु हुन् ।

मे १ ज १३०८ नम्बरको जीप भालुगौडे-सुकेटार पाथीभरा सडकखण्डको छातेढुङ्गा नजिक सोमबार बिहान साढे ८ बजेतिर दुर्घटना हुँदा दिलिप र अनिलजंग घाइते भएका थिए ।

दुर्घटनामा दिलिपकी श्रीमती २५ वर्षीय अनिता थापा घिमिरे र दाजु ३० वर्षीय होमराज घिमिरेको मृत्यु भएको थियो । अनिताको घटनास्थलमै र होमराजको उपचारका क्रममा जिल्ला अस्पताल ताप्लेजुङमा मृत्यु भएको हो ।

दुर्घटनामा जीप चालक इलाम निवासी अमित श्रेष्ठ पनि घाइते भएका छन् । उनलाई पनि जिल्ला बाहिर रेफर गरिएको छ ।