सेनासँग जुध्ने दरवारिया, निर्वाचन आयुक्तमा ​सिफारिसमा…

संवैधानिक परिषदको शुक्रबार बसेको बैठकले निर्वाचन आयुक्तका लागि तीन जनाको नाम सिफारिस गरेको छ । आयुक्त सिफारिसमा पर्नेहरुमा कांग्रेसबाट पूर्वरक्षा सचिव इश्वरी पौडेल, निर्वाचन आयोगकै पूर्वसचिव नरेन्द्र दाहाल र गृहमन्त्रालयका पूर्वसहसचिव सुधीरकुमार शाह छन् । आयुक्तमा सिफारिसमा परेका इश्वरी पौडेल रक्षा मन्त्रालयको सचिव हुँदा सेनाका खरिदमा हुने गरेको अनियमितताको बारेमा सार्वजनिक गरेर चर्चामा आएका थिए । तत्कालीन सेनापति गौरबशमशेर राणाले इजरायलबाट हतियार खरिद गरी ठूलो कमिसन खाने योजनामा पौडेल बाधक बनेका थिए । रक्षा मन्त्रालयको इतिहासमै सेनाको फाइल रोक्ने सचिवका रुपमा उनी चर्चित भए । पौडेलभन्दा अघिका सचिवहरुले सेनाबाट आएका जुनसुकै फाइल पनि अध्ययन नै नगरी सदर गरी आफ्नो दुनो सोझ्याउने गरेका थिए । तर पौडेलले सेना रक्षा मन्त्रालय मातहत हो, त्यसको अनुभूति जनताले गर्न पाउनुपर्छ भन्दै सेनाले पेश गरेका सबै फाइल अध्ययनपछि कानुन अनुसार भए मात्र सदर गरेका छन् ।  सेनाले बेलायतमा एनडीसी कोर्षका लागि पठाएका नक्कली प्रमाणपत्रधारी महासेनानी सुरेन्द्र सिजापतिदेखि बहुविवाहका उजुरी परेका कर्णेल जर्नेलको पदावधि थप नगरेपछि गौरबशमशेर उनीसँग थप आक्रोशित भएका थिए । सेनापति गौरबशमशेर जर्नेलहरुको हुल नै लिएर उनलाई सुदूरपश्चिमान्चल क्षेत्रीय प्रशासन कार्यालयमा सरुवा गराउन तत्कालीन प्रधानमन्त्री सुशील कोइरालाकोमा लबिङ नै गरेका थिए । तर पौडेलले तत्कालीन प्रधानमन्त्री तथा रक्षामन्त्री कोइरालालाई बालुवाटारमै भेटी सेना जननिर्वाचित सरकारमातहत हो भने उसले नियम कानुन मान्नुपर्छ । मैले नियम कानुन अनुसार काम गरेको हुँ । यदि नियम कानुन अनुसार काम गरेकोमा दण्डित गर्नुहुन्छ भने गर्नुस् भनेर कुरा बुझाएपछि गौरबशमशेरले हतियार खरिदमा कमिसन खान सकेनन् र नक्कली शैक्षिक योग्यता भएकाहरुको म्याद पनि थप हुन सकेन । सेनामा शुद्धिकरण गर्न पौडेलले गरेको कामले थोरै भए पनि मद्दत पुगेको थियो ।  माओवादी कोटामा आयुक्त भएका सुधीर शाहले २०५३ मा र २०५८ मा प्रधानमन्त्री भएका लोकेन्द्रबहादुर चन्दका निजी सचिवका रुपमा काम गरेका थिए । मूलतः शाह दरबारीया हुन् । उनी गणतन्त्रपछि माओवादीमा लागेका हुन् । कृष्णबहादुर महरा गृहमन्त्री हुँदा उनी गृहका शक्तिशाली सहसचिवका रुपमा चिनिन्थे । शक्तिबहादुर बस्नेत गृहमन्त्री भएपछि पूर्वआइजीपी कुवेरसिंह रानाको संयोजकत्वमा गठित प्रहरी सुधार सुझाव कार्यदलका सदस्य समेत भएका थिए । माओवादीका एक नेताका अनुसार रुकुम घर भएका शाह शक्ति बस्नेतका नातेदार समेत हुन् ।  एमालेले कनिष्ट भए पनि सचिव बढुवा गरिदिएका दाहाल केही समय निर्वाचन आयोगको सचिव भएर अवकाश भएका थिए । उनी झापाका हुन् । परिषदले सिफारिस गरेका तीनैजना संसदीय सुनुवाइपछि नियुक्ति हुनेछन् । यसअघि केपी ओली सरकारको पालामा अयोधी यादव आयुक्तबाट प्रमुख आयुक्त भइसकेका छन् । कांग्रेसकै कोटाबाट इला शर्मा आयुक्त छिन् । तीनजनाको नियुक्तिपछि आयोगले पूर्णता पाउनेछ ।

श्रोत: दृष्टि साप्तहिक