प्रचण्डलाई पुत्र वियोग त छदैँछ फेरी थपियो अर्को पीडा…

काठमाडौं, फागुन १२ । पुत्रवियोगको पीडा नसकिँदै माओवादी अध्यक्ष प्रचण्डलाई अर्को पीडादायी स्थिति थपिएको छ । केही वर्षअघि आफ्नी प्रिय पुत्री र यसै वर्ष आफ्नो एक मात्र छोरा गुमाएका प्रचण्डलाई थपिएको अर्को पीडा पत्नीको कारणले हो ।

पहिले पनि अलिक असामान्य मानिने प्रचण्डपत्नी सीता दाहाल छोरा प्रकाशको निधनपछि झनै असामान्य बनेकी छिन् । पत्नीको कारण प्रचण्ड पछिललो समय झन तनावमा रहेका बुझिन्छ ।

एकैछिन अघि भेटेको मान्छे कुरा गर्दागर्दै नचिन्ने, पुराना कुराहरू सम्झने तर तत्कालका सन्दर्भ बिर्सने, एक्लै पनि बर्बराइरहनेजस्ता समस्या देखिएपछि केही साताअघि सीतालाई उपचारका लागि भारत पुरÞ्याइएको थियो ।

चिकित्सकहरूले उनलाई अल्जाइमर भएको आशङ्का गरेका छन् । अल्जाइमर दिमागी रोग हो र यो रोग लाग्ने मानिसले शुरुशुरुमा असामान्य व्यवहार देखाउन थाल्छन् ।

रोग बढ्दै जाँदा धेरै पुराना कुराहरू सम्झने, तर अहिले के गर्दै छु भन्ने थाहा नपाउने स्थिति हुन्छ र, त्यस्तो चरणमा प्रवेश गरेपछि नित्य कर्म गर्ने हेक्कासमेत रोगीमा रहँदैन । यो रोग लागेका बिरामी शारीरिक रूपमा ठिकै रहने हुँदा उनीहरू लामै आयु बाँच्ने हुन्छन् ।

सीता दाहालमा समेत यस रोगका लक्षणहरू देखिन थालेपछि पुत्रसुखबाट वञ्चित प्रचण्ड पत्नी जीवित हुँदाहुँदै पत्नीसुखबाट समेत वञ्चित हुने स्थितिमा पुगेका छन् ।