राष्ट्रपतिमा हार्ने र जित्ने दुबै भोजपुरकी चेली

काठमाडौं, २९ फागुन । आज सम्पन्न राष्ट्रपति निर्वाचनमा वर्तमान राष्ट्रपति विद्यादेवी भण्डारी र कुमारी लक्ष्मी राई उम्मेदवार छन् । भण्डारीलाई सत्तारुढ वाम गठबन्धनको समर्थन छ भने कुमारी लक्ष्मी राईलाई प्रमुख विपक्षी दल नेपाली कांग्रेसको समर्थन छ ।

राष्ट्रपति निर्वाचनमा उम्मेदवार बनेका दुईमध्ये वर्तमान राष्ट्रपति विद्यादेवी भण्डारी भारी मतान्तरले विजयी हुने निश्चितै छ । यो अवस्थामा कुमारी लक्ष्मी राईको हार पनि सुनिश्चितै हो । राष्ट्रपतिमा हार्ने र जित्ने यी दुबै चेलीको एउटा समानता छ । हार्ने र जित्ने दुबै भोजपुरकी चेली हुन् ।

दोस्रोपटक राष्ट्रपति चुनिने सौभाग्य प्राप्त गरेकी भण्डारी यसअघि २०७२ कार्तिक ११ गते पहिलोपटक राष्ट्रपतिमा निर्वाचित भएकी थिइन् । उनी आमा मिथिला पाण्डे र बुवा स्व. रामबहादुर पाण्डेको कोखमा २०१८ असार ५ गते भोजपुरको मानेभन्ज्याङ गाउँमा जन्मिएकी थिइन् ।

त्यस्तै, प्रमुख विपक्षी दल नेपाली कांग्रेसको समर्थनमा राष्ट्रपतिको उम्मेदवार बनेकी कुमारी लक्ष्मी राई पनि भोजपुरकी हुन् । राई भोजपुरका पुराना कांग्रेस नेता देवानसिंह राईकी छोरी हुन् । देवानसिंह २०१५ सालमा सांसदमा निर्वाचित भएर बिपी कोइराला नेतृत्वको सरकारमा उपमन्त्री समेत बनेका थिए । मन्त्री भइसकेका देवानसिंहको पञ्चायतकालमा हत्या भएको थियो ।