पक्राउ परेका यातायात व्यवसायीलाई ६ महिना थुन्न सक्ने!

काठमाडौं, २२ वैशाख- हिजो शुक्रबार दिनभर यातायात व्यवसायी महासंघमा आवद्ध कुनै पनि गाडी सडकमा चलेनन् । एनजिओको रुपमा गाडी चलाइरहेका व्यवसायीले सिन्डिकेट हुनुपर्ने माग गर्दै गाडी नचलाउँदा दिनभर यात्रुलाई सास्ती खेप्नु परेको थियो ।

यता सरकार भने सिन्डिकेट विरुद्ध कडा रुपमा प्रस्तुत भएको छ । शुक्रबार देशभरबाट सार्वजनिक यातायात नचलाएर सवारी ठप्प बनाउने ७६ जना व्यवसायीका नेतालाई सरकारले पक्राउ गरेको छ ।

गृह मन्त्रालयका प्रवक्ता रामकृष्ण सुवेदीका अनुसार पक्राउ परेकाहरुलाई ‘सिन्डिकेट’ छोडेको लिखित प्रतिवद्धता गरेमात्र छोडिनेछ । प्रतिबद्धता नगरेमा पक्राउ परेकाहरुलाई घटीमा २४ दिनदेखि ६ महिनासम्म कैद गरिने व्यवस्था छ ।

यातायात व्यवस्था विभागले शुक्रबार माइक्रो नचलाएको भन्दै उपत्यकामा चलिरहेका २६ वटा माइक्रोबसको रुट अनुमति निलम्बन गरेको छ । नयाँ बसपार्क–सामाखुसी–रत्नपार्क रुटभएका (एस फाइभ) मा चल्ने माइक्रोबास रहेको यातायात व्यवस्था विभागका प्रवक्ता तुल्सीराम अर्यालले बताएका छन् ।