कतार युद्धको समर्थनमा छैन, रक्षा मन्त्री अल–अतिया

सिंगापुर, २१ जेठ । कतार यद्धको समर्थनमा नभई वार्ता र छलफलबाट समस्याको समाधान गर्ने पक्षमा भएको कतारी रक्षा मन्त्री खालिद विन मोहम्मद अल–अतियाले बताएका छन् ।

सिङ्गापुरमा भैरहेको अन्तर्राष्ट्रिय सुरक्षा सम्मेलनमा बोल्दै अल–अतियाले कतारले वार्ताबाटै समस्याको हल खोज्न चाहेको बताएका हुन् ।

कतारी रक्षा मन्त्री अल–अतियाले सिङ्गापुरमा भइरहेको अन्तर्राष्ट्रिय सुरक्षा सम्मेलनमा बोल्दै भने, “दुई देशबीच अनेकौँ मतभिन्नताहरू रहेका भएपनि दोहाले इरान विरोधी द्वन्द्वलाई प्रोत्साहन गर्ने छैन ।” कतारले इरानविरुद्ध हुनेगरी द्वन्द्वको वातावरणलाई प्रोत्साहन नगर्ने यहाँका उच्च अधिकारीले आइतबार बताएका छन् ।

उहाँले भन्नुभयो, “के क्षेत्रीय विवादलाई प्रश्रय दिँदै इजरायल र अमेरिकालाई इरानविरुद्ध निम्ताउनु बुद्धिमानी हो रु इरान एक छिमेकी हो ।”
“यदि इरानलाई कमजोर पार्न तेस्रो पक्ष वा अन्य शक्तिराष्ट्रलाई यस क्षेत्रमा निम्त्याइयो भने या क्षेत्रकै लागि धेरै खतरनाक हुनेछ ।”

कतारी रक्षा मन्त्रीको यो प्रतिक्रिया साउदी अरबको नाम नलिइकनै साउदीले इरान तथा इरानलाई सघाएको भन्दै कतारमाथि लगाएको नाकावन्दीप्रति लक्षित गरी आएको हो ।
यसअघि रसियाली एस–४०० हवाई रक्षा प्रणालीलाई भित्राएमा कतारविरूद्ध सैन्य कारबाही गरिने साउदी अरबले चेतावनी दिएको फ्रान्सबाट प्रकाशित हुने ले मोन्डे दैनिकले जनाएको थियो ।

रियादले फ्रान्सेली राष्ट्रपति इमानुयल म्याक्रोँलाई कतारले खरिद गर्न लागेको भनिएको एस–४०० बारे जानकारी गराउँदै यसमा हस्तक्षेपकारी भूमिका निर्वाह गर्न र हतियार खरिदका लागि निकट समयमा हुन लागेको सम्झौता अवरुद्ध गरी क्षेत्रीय स्थायित्वका लागि सहयोग गर्न भनेको एक गोप्य सूचनालाई उद्धृत गर्दै उक्त दैनिकले आफ्नो शुक्रबारको अङ्कमा लेखेको थियो ।

खाडी क्षेत्रका शक्तिराष्ट्रहरू बहराइन, संयुक्त अरब इमिरेट्सलगायतको सहयोगमा साउदी अरबले अतिवादी इस्लामिक समूहहरू तथा इरानसँग निकट भएको आरोपमा कतारसँगको सम्बन्धलाई गत वर्षको जुनदेखि विच्छेद गरेको घोषणा गरेको थियो । इरानलाई रियादको क्षेत्रीय प्रतिस्पर्धीका रूपमा हेरिने गर्छ ।

आफूमाथि लागेको आरोपको कतारले खण्डन गर्दै केही खाडीमुलुकले लगाएको आर्थिक नाकावन्दी अन्यायपूर्ण भएको बताउदै आएको छ ।