गाउँ, नगरका प्रमुख, उपप्रमुखसहित १६ सयलाई पुग्यो अख्तियारको कार्वाही पत्र, जिल्ला सहित

शिखरन्युज, २८ जेठ – गाउँपालिका, नगरपालिकाका प्रमुख, उपप्रमुख लगायतले कानुनले तोकेको समयमा सम्पत्ति विवरण नबुझाउँदा १६ सय जना कार्वाहीमा परेका छन् । स्थानीय चुनाव भएको १ वर्ष बितिसक्दा पनि सम्पत्ति विवरण नुबझाउनेलाई कार्वाहीस्वरुप पत्र पुगेको हो । कानुनलाई अटेर गरेको भन्दै अख्तियार दुरुपयोग अनुसन्धान आयोगले सम्पत्ति विवरण नबुझाएका जनप्रतिनिधिलाई पत्र पठाएको हो ।

विभिन्न गाउँपालिका, नगरपालिकाका प्रमुख, उपप्रमुख, वडाध्यक्ष सहितलाई १ महिनाभित्र ५ हजार रुपैयाँ जरिवानासहित सम्पत्ति विवरण पेस गर्नु भन्दै पत्र पठाएको छ । समयमा सम्पत्ति विवरण नबुझाएका कारण स्थानीय जनप्रतिनिधिलाई हर्जना सहितको ताकेता गरिएको हो ।

कार्वाहीमा परेका जिल्लामा सिरहा, महोत्तरी, सर्लाही, रौतहट, संखुवासभा, तेहथुम, ओखलढुंगा, धादिङ, नवलपरासी पूर्व, मनाङ, पर्वत, हुम्ला, डोल्पा, जाजरकोट, अछाम, कैलाली, दार्चुला, बैतडी, कञ्चनपुर छन् । यी जिल्लाका जनप्रतिनिधिको सम्पत्ति विवरण नबुझाएको राष्ट्रिय सर्तकता केन्द्रले जनाएको छ । अन्य जिल्लाका जनप्रतिनिधिले बुझाइसकेका छन् ।

अख्तियारका प्रवक्ता रामेश्वर दंगालका अनुसार राष्ट्रिय सतर्कता केन्द्रले बुझाएको विवरणका आधारमा अख्तियारले जनप्रतिनिधिलाई कार्वाही सहितको पठाइएको हो । स्थानीय सरकार सञ्चालन ऐन, २०७४ को दफा ११० मा स्थानीय तहका जनप्रतिनिधिले पदमा बसेको ६० दिनभित्र आफ्नो र परिवारका नाममा रहेको चलअचल सम्पत्ति सम्बन्धित निकायमा पेश गर्नुपर्ने व्यवस्था छ।