पुरुषले नर्सिङ पढ्न आरक्षण कोटा पाए, अब ‘पुरुष नर्स’

शिखरन्युज, १२ असार – महिलाले मात्र पढ्दै आएको नर्सिङ शिक्षा अबदेखि पुरुषले पनि पढ्न पाउने भएका छन् । कूल नर्सिङ शिक्षामा भएको कोटाको १५ प्रतिशत पुरुषले आरक्षण पाउने भएका हुन् । अब नर्स भन्ने वित्तिकै महिला मात्र हुन्छन् भन्ने मानसिकता त्यागेर पुरुषलाई पनि सम्झनुपर्ने भएको छ ।

लामो समयदेखि पुरुषले नर्सिङ पढ्न पाउनुपर्ने माग पूरा भएको छ । नेपाल नर्सिङ परिषद्ले पुरुषलाई पनि नर्सिङ पढ्न पाउने गरी निर्णय गरेपछि महिला पुरुष दुवैलाई नर्सिङ पढ्ने बाटो खुलेको हो ।

नेपाल नर्सिङ परिषद्का अध्यक्ष गोमादेवी निरौलाका अनुसार धेरै माग भएपछि आवश्यकता महसुस गरी निर्णय भएको हो । शैक्षिक सत्र २०७५/७६ देखि लागू हुने गरी १५ प्रतिशत पुरुषलाई नर्सिङ अध्ययनमा समावेश गराउने निर्णय गरेको छ ।

विश्वविद्यालय, प्रतिष्ठान र प्राविधिक शिक्षा तथा व्यावसायिक तालीम परिषद्अन्तर्गतका नर्सिङ शैक्षिक संस्थालाई पुरुषलाई भर्ना गर्न सूचना जारी गरिसकेको अध्यक्ष निरौलाले जानकारी दिइन्।
नेपाल नर्सिङ संघले पुरुषलाई कोटा दिनुपर्ने माग राख्दै नेपाल नर्सिङ परिषद्लाई पत्र पठाएको थियो।

नेपालमा महिलालाई मात्र पढाइ हुँदै आएपनि विदेशमा पुरुषले नर्स पढ्न पाउने व्यवस्था छ । लैङ्गिक समानताका लागि नेपालमा पुरुष नर्स चाहिन्छ भनेर हामी सबैले आवाज उठाउँदै आएका थिए ।

परिषद्मा नेपाल र भारतमा अध्ययन गरेका १०५ जना पुरुष नर्स परिषद्मा दर्ता भएका छन्। अब निर्णय कार्यान्वयन भएमा वार्षिक १२५ कलेजबाट १५ प्रतिशत पुरुष नर्स उत्पादन हुँदा वर्षमा एक हजार १५५ पुरुष नर्स तयार हुने अनुमान गरिएको छ । वार्षिक १२५ भन्दा बढी नर्सिङ कलेजबाट ७ हजार ७४० जना नयाँ महिला नर्स उत्पादन हुँदै आएका छन्।