निर्मला हत्या प्रकरणमा पक्राउ परेका बम दिदीबहिनीको म्याद थप

कञ्चनपुर, ११ भदौ । कञ्चनपुरमा १३ वर्षीया किशोरी निर्मला पन्तको बलात्कारपछि भएको हत्या प्रकरणमा पक्राउ परेका बम दिदीबहिनी रोशनी र बबिताको सोमवार अदालतबाट म्याद थप गरिएको छ । उनीहरु घटनाको अनुसन्धानका क्रममा पक्राउ परेका थिए ।

बम दिदीबहिनीलाई जिल्ला प्रहरी कार्यालयले शनिबार पक्राउ गरेको थियो । उनीहरुलाई थुनामा राख्न म्याद थप गरिएको जनाइए पनि कति दिन म्याद थपिएको भन्ने खुलाएको छैन । एक महिनाअघि भीमदत्त नगरपालिका–२ उल्टाखामकी १३ वर्षीया निर्मला पन्तको बलात्कारपछि हत्या भएको थियो ।

प्रहरीले अनुसन्धानका क्रममा लापर्वाही गरेको भन्दै आन्दोलन चर्केपछि तत्कालीन सुरक्षा निकायका प्रमुख फेरिएका थिए । त्यसपछि नयाँ अनुसन्धान टोलीले शून्यबाटै अनुसन्धान शुरु गरेको थियो । म्याद थपसँगै बम दिदी–बहिनीसँग बयान लिने तथा अन्य अनुसन्धानको काम चलिरहेको जिल्ला प्रहरी कार्यालयका डिएसपी कृष्ण ओझाले जानकारी दिए ।