मलेसियाले बढायो कामदारको पारिश्रमिक
सारांश
- काठमाडौं, १८ कात्तिक ।
- मलेसियन सरकारले निजी क्षेत्रमा कार्यरत कामदारको न्यूनतम मासिक पारिश्रमिक वृद्धि गरेको छ ।
- मलेसियन संसदले आउँदो आर्थिक वर्षको बजेट पेस गर्दै अर्थमन्त्री लिम ग्वान इङले यस्तो घोषणा गरेका हुन् ।
काठमाडौं, १८ कात्तिक । मलेसियन सरकारले निजी क्षेत्रमा कार्यरत कामदारको न्यूनतम मासिक पारिश्रमिक वृद्धि गरेको छ । मलेसियन संसदले आउँदो आर्थिक वर्षको बजेट पेस गर्दै अर्थमन्त्री लिम ग्वान इङले यस्तो घोषणा गरेका हुन् । मलेसियन सरकारको घोषणाअनुसार अब १ जनवरीदेखि निजी क्षेत्रमा कार्यरत कामदारले मासिक न्यूनतम ११ सय रिंगेट पारिश्रमिक पाउनेछन् ।
हाल मलेसियामा बहुसंख्यक नेपाली मलेसियामा कार्यरत छन् भने पूर्वी मलेसियामा काम गर्ने नेपालीको संख्या निकै कम छ । अहिले मलेसियामा करिब ६ लाख नेपाली कार्यरत छन् तर कतिपय रोजगारदाता भने सरकारले ल्याएको न्यूनतम पारिश्रमिक वृद्धिप्रति सहमत छैनन् । मलेसियाले हरेक दुई÷दुई वर्षमा ‘न्यूनतम पारिश्रमिक नीति’ मा पुनरावलोकन गर्ने प्रावधान छ । मलेसियन सरकारको यस्तो कदमपछि अब निःशुल्क भिसा र हवाई टिकटसहित शून्य लागतमा मलेसिया जाने कामदारलाई निकै फाइदा हुने सम्बन्धित सरोकारवालाहरूको भनाइ छ ।
वैदेशिक रोजगारीका लागि नेपाली कामदार मलेसिया जान थालेको १७ वर्षपछि गत साता बल्ल नेपाल सरकार र मलेसियन सरकारबीच कामदार भर्ना रोजगारी र फिर्तासम्बन्धी समझदारीपत्रमा हस्ताक्षर भएको छ । गत सोमबार राजधानीमा नेपालका तर्फबाट श्रम, रोजगार तथा सामाजिक सुरक्षामन्त्री गोकर्ण विष्ट र मलेसियाको मानव संशाधनमन्त्री एम कुलासेगरनले सो समझादारीपत्रमा हस्ताक्षर गरेका हुन् ।
प्रतिक्रिया