डढेलो प्रभावित क्षेत्र पुगे अमेरिकी राष्ट्रपति

अमेरिकी इतिहासमा अहिलेसम्मकै सबैभन्दा भीषण भनिएको डढेलोले निम्त्याएको विनाशको आंकलन गर्न राष्ट्रपति डोनाल्ड ट्रम्प क्यालिफोर्निया पुगेका छन् । क्याम्प फायर नामक डढेलोका कारण अहिले क्यालिफोर्नियाको जंगल आगलागको सन्त्रास छ । डढेलोका कारण अहिलेसम्म ७१ जनाले ज्यान गुमाइसकेका छन् र १ हजारभन्दा बढी हराइरहेका छन् । ज्यान गुमाउनेको संख्या अझै बढ्न सक्ने बताइएको छ ।

विनाशको आंकलन गर्न क्यालिफोर्निया पुगेका राष्ट्रपति ट्रम्पले प्याराडाइज नगरमा बोल्दै यस्तो भयावह दृश्य देख्दा निकै दुख लागेको प्रतिक्रिया दिएका छन् । ट्रम्प्पले आगलागी हुनुमा जंगलको कमजोर व्यवस्थापन कारण भएको बताएका थिए । र, आफ्नो त्यही दावीलाई प्याराडाइज नगरमा पनि उनले दोहोर्याए । उनले व्यवस्थापनमा सुधार ल्याउन आवश्यक भएको र वातावरण संरक्षणवादी समूहहरुसँग मिलेर सरकारले काम गर्ने पनि बताए ।

विज्ञहरूले मौसम, जलवायु परिवर्तन लगायतलाई डढेलोको प्रमुख कारण ठहर्याएका छन् । राडाइज नगरमा ट्रम्पले कानून कार्यान्वयन गराउने स्थानीय निकाय, राजनीतिज्ञ र खोजी कार्यमा संलग्नहरूको प्रशंसा गरे ।