राजपा र फोरमबीच एकता नहुने, यादव-महतोले गरे यस्तो खुलासा

काठमाडौैं, ९ पुष । राजपा र फोरम नेपालबीच तत्काल पार्टी एकता नहुने भएको छ । राजपा नेपालका अध्यक्ष मण्डलका संयोजक राजेन्द्र महतोले दिएको जानकारी अनुसार तत्काल दुई पार्टीबीच एकता नहुने भएको छ ।

उता, फोरम नेपालका अध्यक्षसमेत रहेका उपप्रधानमन्त्री उपेन्द्र यादवले पनि तत्काल दुई पार्टीबीच एकता नहुने जनाए । पत्रकार ऋषि धमलासँग कुरा गर्दै यादवले भने,‘हामी दुई पार्टीबीच पार्टी एकता हुने भनेर हल्ला चलाईएको छ । यसमा कुनै सत्यता छैन् ।’ उता यी दुई पार्टीबीच प्रदेश नम्बर २ मा रहेको गठबन्धन भने तत्काल नटुट्ने भएको छ ।

फोरम नेपालले राष्ट्रिय जनता पार्टी (राजपा) नेपाल लगायत मुद्दा र विचार मिल्ने अन्य दलसँग एकीकरणका लागि वार्ता समिति गठन गरेको थियो । फोरमको उक्त निर्णय राजपा नेपालले त्यसको स्वागत गरेको थियो । राजपा नेपालले समितिको स्वागत गरेपनि वार्ताका लागि फोरम सरकारबाट फिर्ता हुनुपर्ने सर्त अघि सारेको छ । राजपा नेपालका संयोजक राजेन्द्र महतोले फोरम नेपाल सरकारमा रहेसम्म वार्ता हुन नसक्ने प्रतिकृया दिएका छन् ।