पशुपतिघाटबाट बगाएर बेपत्ता तीनमध्ये एक जनाको शव फेला

श्रावण ५, २०७४- सेती नदीमा नुहाउन जाँदा गत सोमबार पोखरा–३३ भरतपोखरी, पशुपतिघाटबाट बगाएर बेपत्ता तीनमध्ये एक जनाको शव बुधबार बिहान फेला परेको छ । दाङको वणगलाचुली–३ पाखापानीकी १८ वर्षीया संगीता नेपालीको शव तनहुँको रिसिङ–१ मा पर्ने सेती नदी किनारमा फेला परेको प्रहरीले जनाएको छ ।
पशुपतिघाटमा नुहाउन गएका दाङको एउटै गाउँका संगीता, ध्वनि नेपाली र सुनील परियारलाई सेतीले बगाएको थियो । उनीहरू उक्त घाटमा बालुवा चाल्ने काम गर्दै आएका थिए । नुहाउन सेतीमा पसेकी संगीतालाई बगाएपछि बचाउन जाँदा थप दुई जनालाई पनि बगाएको थियो । नदी किनारबाट तीनै जनाको कपडा र मोबाइल फेला परेको थियो । शव पोस्टमार्टमका लागि तनहुँ जिल्ला अस्पताल ल्याइएको प्रहरी निरीक्षक विजय पण्डितले बताए ।
यस्तै मनाङ जिल्लाको नेस्याङ–७ बस्ने ५६ वर्षीय कान्छा गुरुङको शव बुधबार नेस्याङ–४ भ्राका खोलामा फेला परेको छ । मंगलबार बेलुकीदेखि घरबाट हराएको भन्दै उनको खोजी भइरहेको थियो ।