नेपालमा माक्र्सवाद पढाउन (नेकपा) का बरिष्ठ नेता ब्राजिल भ्रमणमा !

काठमाडौं, २१ जेठ । हालै दुई पार्टी एकता भएर गठन भएको नेपाल कम्युनिष्ट पार्टी(नेकपा)ले एसियामा कम्युनिष्ट पार्टी सम्बन्धी प्रचार प्रसार गर्ने भएको छ ।

सो पार्टीका दुई नेता एसियाली स्तरमा कम्युनिष्ट स्कूल सञ्चालन गर्न भन्दै अवलोकन भ्रमणमा निस्केका छन् । नेकपाका बरिष्ठ नेता नेताद्धय माधव कुमार नेपाल र नारायणकाजी श्रेष्ठ ब्राजिलमा रहेको एक राजनीतिक स्कूलको भ्रमणका लागि त्यसतर्फ जान लागेका हुन् ।

ब्राजिल भ्रमणको क्रममा नेताद्वयले फ्लोर्सटन फर्नान्डेज नेशनल स्कुलको अवलोकन भ्रमण गर्ने जनाइएको छ । सो स्कुलले ब्राजिलमा माक्र्सवादबारे नियमन प्रशिक्षण सञ्चालन गर्दै आएको छ । नेपालमा पनि माक्र्सवादबारे नियमन अध्यापनका लागि मदन भण्डारी एसियन स्कुल स्थापनाको तयारी भैरहेको छ । सो स्कुल स्थापनाका लागि ब्राजिलको अनुभव बुझ्न दुई नेता भ्रमणमा निस्किएको जनाइएको छ ।

बरिष्ठ नेता नेपालले अब नेपालमा एसियाभरिका विद्यार्थीहरु भेला पारेर माक्र्सवादबारे अध्यापन सुरु गर्ने लक्ष्यका साथ ब्राजिल भ्रमणमा निस्केका हुन् । मदन भण्डारी एसियन स्कुल स्थापनाको पहल भइरहेको छ ।

नेताद्वय दश दिनपछि स्वदेश फर्कने छन् ।