अनशन तोडाउँदा गरिएको सहमति कार्यान्वयन गर्न डा. केसीको ध्यानाकर्षण

काठमाडौं, २२ साउन । डा. गोविन्द केसीले सरकारले आफ्नो अनसन तोडाउँदा गरेको सहमति कार्यान्वयन गर्न ध्यानाकर्षण गराएका छन् । चिकित्सक केसीको अनशनका क्रममा सरकार र गोविन्द केसीबीच ९ बुँदे सहमति भएको थियो ।

वरिष्ठ चिकित्सक केसीले अनशन तोडाउने क्रममा आफूसँग गरिएको नौंबुदे सहमति मन्त्रीपरिषद बैठकबाट अनुमोदन गराउने भनिए पनि अनुमोदन नगरिएको विषयमा असन्तुष्टि व्यक्त गरेका थिए । उनले सो काम तत्काल पूरा गर्न पनि सरकारलाई स्मरणसमेत गराए ।

करिव दुई साता उपचारपछि मंगलबार डिस्चार्ज भएका उनले महाराजगंजस्थित शिक्षण अस्पतालमा पत्रकार सम्मेलन गरी आफूसँग गरिएको नौं बुँदे सहमति कार्यान्वयनमा ढिलाई नगर्न सरकारको ध्यानाकर्षण गराएका हुन् । वरिष्ठ चिकित्सक केसीले संसदमा विचाराधीन राष्ट्रिय चिकित्सा शिक्षा विधेयक पारित गर्न पनि ढिलाई गर्न नहुने बताए । उनले आफूसँग गरिएको सहमति कार्यान्वयनमा नआए कडाभन्दा कडा आन्दोलन गर्न बाध्य हुने चेतावनी पनि दिए ।

डा. केसीले कर्णाली स्वास्थ्य विज्ञान प्रतिष्ठानको काम अघि बढाउन कार्यदल बनाउने तथा जाँचबुझ आयोगले दोषी ठहर गरेका पदाधिकारीहरुलाई कारवाही गर्ने लगायतका सहमति कार्यान्वयनमा ढिलाई नगर्न पनि माग गरेका थिए ।