अब जन्मँदै जर्नेल हुने जमाना गए : प्रधानमन्त्री ओली

काठमाडौं ९ जेठ – प्रधानमन्त्री केपी शर्मा ओलीले अब जन्मदै जर्नेल हुने जमाना गएको भन्दै व्यंग्य गरेका छन् । प्रधानमन्त्री निवास बालुवाटारमा मंगलबार नेपाली सेनाको इन्द्रध्वज गणको बिदाई कार्यक्रममा प्रधानमन्त्री ओलीले जन्मसिद्ध श्रेष्ठताको आधारहीन सिद्धान्तको समय सकिएकाले अब प्रतिष्पर्धा र क्षमताको आधारमा अवसर पाउने प्रणालीको सुरुआत भएको बताएका हुन् ।

‘अब जन्मदै जर्नेल हुने जमाना गयो, अब सक्षम, प्रतिष्पर्धी, योग्य व्यक्तिले यस्ता अवसरहरु पाउँछन्’ प्रधानमन्त्रीले भने । सरकारले जनता, सेना, मजदुरको हितमा काम गर्ने दाबी समेत गरेका छन् । प्रधानमन्त्री ओलीले देशमा अधिकारसहितको लोकतन्त्रको स्थापना भएको बताए ।

सेनाले अब बंकरमा बस्नु नपर्ने बताउँदै ‘तालीमको बेलाबाहेक सेनाले अब बंकरमा बस्नु पर्दैन, सेनालाई अब व्यावसायिक, दक्ष र प्रतिष्पर्धी बनाइन्छ ।’ सेनाले नेपालको अखण्डता, राष्ट्रियता, स्वाधीनताको रक्षामा सदा उच्च भूमिका निर्वाह गरेको प्रधानमन्त्री ओलीको भनाइ थियो ।