अब यसरी घरको भित्तामा खेतीपाती हुन्छ

विज्ञानको विकासका अगाडि संसारले पटकपटक आश्चर्यचकित हुनु परेको छ । विश्वमा कतिपय यस्ता चमत्कार विज्ञानको विधीले सम्भव गरिसकेको छ, जसको कुनैबेला कल्पनासमेत गर्न कठीन हुन्थ्यो । प्रसंग हो आधुनिक कृषिको । तर त्यस्तो कृषि जुन खेतबारीमा नभई घरका भित्तामा गरिन्छ । विज्ञानले यस्तै अपत्यारिलो कुरालाई चमत्कारका रुपमा सार्थक तुल्याउँदै आएको छ । इजरायली कम्पनी ‘ग्रीनवाल’का संस्थापकहरु अहिले ‘भर्टिकल गार्डन’लाई मूर्त रुप दिन व्यस्त छन् । यो पद्धतिअनुसार मानिसले घरको पर्खालमा खेती गर्न सक्नेछन् ।

अग्ला घरका विशाल भित्ताहरुमा विभिन्न बाली लगाउने विषयलाई सार्थक तुल्याउने दिशामा उनीहरुले आवश्यक खोज तथा अनुसन्धान गरेका हुन् । सन् २००९ मा स्थापित ग्रीनवाल कम्पनीले विकास गरेको आधुनिक प्रबिधीको मद्दतमा मानिसले घरको भित्ताको भित्री र बाहिरी गरी दुबैपट्टी खेती गर्न सक्नेछन् । यो पद्धतिका लागि ग्रीनवाल कम्पनीले नै उब्जाउयोग्य माटो उपलब्ध गराउँने बताइएको छ । ‘भर्टिकल प्लान्टिङ सिस्टम’का लागि बिरुवालाई ‘स्मल मोड्युलर युनिट’मा सघन रुपमा लगाउने गरिन्छ । बिरुवा भित्ताबाट तल नझरोस् भन्नका लागि पनि विशेष व्यवस्था गरिएको हुन्छ । कम्प्युटर प्रविधिको मद्दतले प्रत्येक बिरुवामा पानी प¥ुयाउने व्यवस्था गरिएको हुन्छ । फल लाग्ने समय भएपछि भने बिरुवालाई जमिनमा उतारिन्छ ।

ग्रीनवालले पर्खालमा खेती गर्नका लागि मनिटर, सेन्सर र कन्ट्रोल सिस्टम भने इजरायली वाटर म्यानेजमेन्ट कम्पनी ‘गेलकन’ को सहयोगमा विकसित गरिएको बताइएको छ । बढ्दो शहरीकरणको प्रभावमा खेतीका लागि जमिनको अभाव बढ्नु र जनसंख्या वृद्धिदर पनि लगातार हुँदैजानु जस्ता कारणले खाद्य संकट निम्तिने निश्चित छ । यस्तो अवस्थामा पर्खालमा गरिने खेती पद्धतिको विकासलाई खाद्य संकट टार्ने एउटा प्रयासका रुपमा हेरिएको छ ।