आइसिपीको मूलढोकामा धर्ना निर्माण कार्य प्रभावित

वीरगञ्ज, ११ फागनु, पर्सा जिल्लाको वीरगञ्ज महानगरपालिका वडा नं २० अलौमा उद्घाटनको संघारमा रहेको एकीकृत सुरक्षा जाँच चौकी (आइसिपी) अगाडि मुआब्जापीडितले १५ दिनदेखि धर्ना दिँदा निर्माण कार्य प्रभावित भएको छ ।

आइसिपी नेपाल मुआब्जापीडित ३४६ घरपरिवारले ११० बिघा खेतीयोग्य जग्गाको मुआब्जा माग गर्दै विगत १५ दिनदेखि धर्ना दिँदै आएका छन् । नेपाल र भारतका सरकारी संयुक्त टोलीले २०६७ असोज १ गते प्रस्तुत गरेको प्रतिवेदनअनुसार सरकारले हालसम्म पीडित किसानलाई मुआब्जा उपलब्ध नगराउँदा सोको विरोधमा आन्दोलनमा उत्रेको संघर्ष समितिका अध्यक्ष सुमेश्वरनाथ उपाध्यायले राससलाई बताउनुभयो ।

यस सम्बन्धमा प्रमुख जिल्ला अधिकारी विनोदप्रकाश सिंहसँग जिज्ञासा राख्दा आइसिपीको मूलढोका बाहिर आन्दोलनकारीले धर्ना दिए पनि भित्रचाहिँ काम भइरहेको र यस सम्बन्धमा माथिल्लो निकायलाई जानकारी गराइसकिएको बताउनुभयो ।

भारत सरकारको रु एक अर्ब ३९ करोडको लागतमा सन् २०११ देखि निर्माण शुरु भएको सो आसिपीको काम भारततर्फ सम्पन्न भए पनि नेपालतर्फ भने ९८ प्रतिशत काम पूरा भएको छ । नेपालतर्फका आइसिपी निर्माण गरिरहेको भारतीय परामर्श दाता राइट्स कम्पनी लि आइसिपीको निर्माण कार्य लगभग सम्पन्न अवस्थामा रहेकाले निकट भविष्यमै सञ्चालनमा आउने जनाउको छ ।

आइसिपी निर्माण कार्य लगभग पूरा भए पनि सुख्खा बन्दरगाहदेखि आइसिपीसम्म करिब सात मिटर सडक विस्तार भने हुन सकेको छैन । यसका लागि नेपाल सरकारले अर्थमन्त्रालयमार्फत रु ९० करोडमध्ये रु ३० करोड विनियोजित गरिसकेको छ ।

नेपाल सरकारले परराष्ट्र मन्त्रालयमार्फत आइसिपी उद्घाटनको कार्यक्रम बनाएर भारत पठाउने तयारीमा रहेकाले चाँडै नै आइसिपी सञ्चालनमा आउने विश्वास उद्योग वाणिज्य संघका अध्यक्ष ओम प्रकाश शर्माको छ ।