आज लोकतन्त्र दिवस मनाइँदै

काठमाडौं, ११ वैशाख, आज लोकतन्त्र दिवस । २०६२-०६३ को आन्दोलनको उपलब्धि वैशाख ११ लाई मान्दै आज लोकतन्त्र दिवस मनाइँदैछ ।

तत्कालीन राजा ज्ञानेन्द्र विरुद्ध उर्लिएको आन्दोलनले २०५९ जेठ ८ गते विघटन भएको संसद् २०६३ वैशाख ११ गते पुनःस्थापना भएको थियो । २०६३ मंसिरमा १२ बुँदे समझदारीका माध्यमबाट तीन ध्रुवमा विभाजन भएका राजनीतिक दल एकैठाउँमा भएका थिए ।

सडकमा मानवसागरले भरिएपछि राजा ज्ञानेन्द्र दलको मार्गचित्रमा सहमत भएका थिए । आन्दोलनरत दलले गरेकै मस्यौदाका आधारमा राजा ज्ञानेन्द्रले वैशाख ११ गते राति संसद् पुनःस्थापनाको घोषणा गरी बैठकसमेत आह्वान गरेका थिए । यसैले यस दिनलाई लोकतन्त्रको रुपमा दिवस मनाउने गरिएको छ।

२०६३ जेठ ४ मा पुनःस्थापित संसद्ले राजदरबारको अधिकार कटौती गरेको थियो। बैठकले माओवादीलाई शान्ति प्रक्रियामा ल्याई संविधानसभा निर्वाचन गर्ने संकल्प प्रस्ताव पारित गरेको थियो। लोकतन्त्रको जगमा २०६४ चैत २८ मा पहिलो संविधानसभा निर्वाचन भएको थियो। संविधानसभाको २०६५ जेठ १५ गते बसेको पहिलो बैठकले २ सय ४० वर्षको राजसंस्थाको विधिवत् अन्त्य गरेको थियो ।

त्यसपछि २०७० मंसिर ४ मा दोस्रो संविधानसभा निर्वाचनबाट निर्वाचित सभाले २०७२ असोज ३ गते संघीय लोकतान्त्रिक गणतन्त्र नेपालको संविधान जारी गरेको थियो । लोकतन्त्र दिवसमा दिंदै आएको विदा सरकारले यसपटक देखि कटौति गरेको छ ।