उपेन्द्रलाई बेवास्ता गर्दै ओली-प्रचण्डको मोह राजेन्द्र महतोप्रति !

काठमाडौं, ११ जेठ । सत्तारुढ दल नेकपाका अध्यक्षद्धय केपी शर्मा ओली र पुष्पकमल दाहाल प्रचण्ड यतिवेला राजपा नेपाललाई सरकारमा ल्याउने कसरतमा लागेका छन् ।

स्रोतका अनुसार ओली र प्रचण्डबीचको आन्तरिक सहमति अनुसार राजपा नेपाललाई सरकारमा ल्याउनेगरि गृहकार्य भैरहेको छ । राजपा नेपालका अध्यक्ष मण्डलका सदस्य राजेन्द्र महतो लगायतका नेताहरु सकारात्मक छन् । सत्तारुढ दल नेकपा संविधान संशोधन गर्न तयार छ ।

यसअघि संघीय समाजवादी फोरम नेपाललाई सरकारमा ल्याउने गृहकार्य भएको कुरा आएको थियो । तर, २ नम्बर प्रदेशका मुख्यमन्त्री लालबाबु राउतले भारतीय प्रधानमन्त्री नरेन्द्र मोदीको जनकपुर भ्रमणको क्रममा आयोजित नागरिक अभिनन्दन कार्यक्रममा संविधान संशोधन संशोधनजस्तो आन्तरिक विषयमा विवादस्पद अभिव्यक्ति दिएकोले प्रधानमन्त्री समेत रहेका अध्यक्ष ओली र अर्का अध्यक्ष प्रचण्ड रुष्ट छन् ।

फोरम अध्यक्ष उपेन्द्र यादवले मुख्यमन्त्री यादवको बचाउ गरे । यादव र सत्तारुढ दल नेकपाका अध्यक्षद्धयबीच राम्रो सम्बन्ध नरहेको समेत स्रोतको दाबी छ । यादवले पनि सरकारको कडा रुपमा आलोचना गरिरहेका छन् । फोरमको तुलनामा राजपाले सरकारको त्यति आलोचना तथा विरोध गरेको छैन् ।