समयमै मनसुन: कोशी प्रदेशमा साउनको पहिलो सातासम्ममै ७४ प्रतिशत धान रोपाइँ सम्पन्न

कोशी प्रदेशमा यस वर्ष बेलैमा मनसुन सक्रिय भएसँगै मुख्य खाद्यबाली धानको रोपाइँले तीव्रता पाएको छ। प्रदेश कृषि, उद्योग तथा सहकारी मन्त्रालयको ताजा तथ्याङ्क अनुसार साउनको पहिलो सातासम्ममा कुल रोपाइँ योग्य जमिनको करिब ७४ प्रतिशत भूभागमा धान रोपाइँ सकिएको हो। यसले आगामी हिउँदमा प्रदेशको खाद्य सुरक्षा स्थिति सुदृढ हुने सकारात्मक संकेत देखाएको छ।

मन्त्रालयका कृषि प्रसार अधिकृत अभिमन्यु अधिकारीका अनुसार साउन ४ गतेसम्मको अवधिमा प्रदेशका तीनवटै भौगोलिक क्षेत्रमा किसानहरू व्यस्त देखिएका छन्। समयमै वर्षा भएका कारण तराईदेखि उच्च पहाडी भेगसम्मका खेतहरूमा रोपाइँ सुचारु भइरहेको छ। कृषि प्राविधिकहरूका अनुसार सिँचाइको उपलब्धता र अनुकूल मौसम नै यस वर्षको रोपाइँ द्रुत गतिमा हुनुको मुख्य आधार हो।

भौगोलिक बनोटका आधारमा हेर्दा कोशी प्रदेशको उच्च पहाडी क्षेत्रमा पर्ने ताप्लेजुङ, सङ्खुवासभा र सोलुखुम्बूमा रोपाइँको राम्रो प्रभाव देखिएको छ। ती जिल्लाहरूमा रहेको कुल १५ हजार ३८३ हेक्टर धान खेतमध्ये हालसम्म नौ हजार २४१ हेक्टर क्षेत्रफलमा रोपाइँ सम्पन्न भइसकेको कृषि मन्त्रालयको तथ्याङ्कमा उल्लेख छ।

त्यस्तै मध्य पहाडी भेगका पाँचथर, इलाम, भोजपुर, तेह्रथुम, धनकुटा, उदयपुर, ओखलढुङ्गा र खोटाङ गरी आठ जिल्लाहरूमा पनि रोपाइँले गति लिएको छ। यी जिल्लाहरूमा धान खेती गरिने कुल ६७ हजार ७१७ हेक्टर क्षेत्रमध्ये ४८ हजार ७६६ हेक्टर जमिनमा किसानहरूले धान रोपेर सकिसकेका छन्।

प्रदेशको अन्नभण्डार मानिने तराईका तीन प्रमुख जिल्लाहरू झापा, मोरङ र सुनसरीमा भने सबैभन्दा धेरै क्षेत्रफलमा रोपाइँ भएको छ। त्यहाँको कुल एक लाख ९३ हजार २८५ हेक्टर धान उत्पादन हुने भूमिमध्ये हालसम्म एक लाख ४६ हजार ३४२ हेक्टरमा रोपाइँ सकिएको अधिकारीले जानकारी दिनुभयो।

 बाँकी रहेका भूभागमा पनि साउन महिनाभित्रै रोपाइँ सम्पन्न गर्ने लक्ष्यका साथ कृषकहरू लागिपरेका छन्।