उल्टो मोटरसाइकल चलाउने चित्रकुमारले पाए यस्तो उपहार

उदयपुर, २२ माघ । सुल्टो मोटरसाइकल त सबैले चलाउँछन् । उल्टो मोटरसाइकल चलाउने पनि हाम्रै नेपालमा छन् । उल्टो मोटरसाइकल यात्रीको रुपमा साहसिक काम गर्ने चित्रकुमार कार्कीलाई कम्पनीले नै बजार मूल्य करिब ४ लाख बराबरको २३० सीसी यूएमडिएसआर मोटरसाइकल उपहार दिएको छ ।

उल्टो मोटरसाइकल यात्री उदयपुरका चित्रकुमार कार्कीलाई आइएमसी ग्रुपले अमेरिकन कम्पनीको तर्फबाट आइतबार मोटरसाइकल उपहार प्रदान गरेको छ । कम्पनी प्रतिनिधि उज्वल जोशी र आइएमी ग्रुपका कन्ट्री मेनेजर दीपेश कायस्थले एक समारोहबीच कार्कीलाई मोटरसाइकल हस्तान्तरण गरेका हुन् ।

उल्टो मोटरसाइकल यात्री कार्कीले उपहारस्वरुप मोटरसाइकल पाएपछि आफूलाई अझ राम्रा र साहसिक कामहरु गर्दै जाने प्रेरणा मिलेको बताए । विश्व उल्टो मोटरसाइकल यात्रुको रुपमा गिनिज बुकमा नाम दर्ता गर्ने लक्ष्यका साथ अगाडि बढिरहेको उनले बताए ।

मेची–महाकाली उल्टो मोटरसाइकल यात्रा गरिसकेका उनले आफूलाई सहयोग गरेर यो अवस्थासम्म पुराउने सम्पूर्णलाई सम्झिदै धन्यवाद ज्ञापन गरे । उनले विभिन्न सामाजिक कार्य समेत गर्दै आएका छन् ।