एमाले–माओवादीको कुरा नमिल्दा प्रदेश ६ मा सरकार गठनमा ढिलाइ

काठमाडौं, २९ माघ – प्रदेश ६ मा सरकार गठन, सभामुखको चयनलगायतका विषयमा एमाले र माओवादीबीच अलमल देखिएको छ । दुवै दलले संसदीय दलको नेता चयन गरेको भए पनि सरकार गठन, सभामुखको चयनलगायतका विषयमा छलफल गरेका छैनन् । आजको नयाँ पत्रिका दैनिकमा योगेश ढकालले खबर लेखेका छन् ।

माओवादी संसदीय दलका नेता महेन्द्रबहादुर शाहीले भने, ‘अहिलेसम्म त्यस विषयमा छलफल भएको छैन ।’ यससँगै एमाले र माओवादीबीच मन्त्रालयको बाँडफाँडका विषयमा पनि छलफल हुन सकेको छैन ।

सरकार गठन र मन्त्रालय बाँडफाँडलगायतका विषयमा अहिलेसम्म दुई दलबीच छलफल नभएको एमाले नेता प्रकाश ज्वालाले बताए । उनले भने, ‘अहिले एमालेबाट कसको नेतृत्वमा सरकारमा जाने भन्ने पनि टुंगो लागेको छैन ।’

वाम गठबन्धनको सहमतिअनुसार यो प्रदेशमा मुख्यमन्त्रीसहित माओवादीले तीन र एमालेले चार मन्त्रालय पाउनेछन् । तर, प्रदेशमा भने एमाले र माओवादीबीच मन्त्रालय भागबन्डाका विषयमा औपचारिक छलफल भएको छैन ।

‘कुन मन्त्रालय कसले लिने भन्ने विषयमा छलफल भइसकेको छैन, सभामुखको घोषणापछि छलफल सुरु हुन्छ,’ माओवादी नेता शाहीले भने ।

मन्त्रीका आकांक्षी धेरै
एमाले र माओवादीका प्रदेश सभा सदस्यमध्ये अधिकांश मन्त्रीका आकांक्षी छन् । एमालेबाट हुम्लाका दल रावल, सल्यानका गुलावजंग शाह, दैलेखका अमरबहादुर थापा, मुगुका चन्द्रबहादुर शाही, सुर्खेतका खड्कबहादुर खत्री, मीना सिंह रख्याल दाबेदार छन् ।

त्यस्तै माओवादीबाट नरेश भण्डारी, सीता नेपाली, धर्मराज रेग्मी, विमला केसी, विन्दमान विष्ट, रातो कामी, गोपाल शर्मा, गणेश सिंह, पुष्पा घर्ती दाबेदार छन् । भण्डारी र नेपाली मुख्यमन्त्रीका समेत दाबेदार रहेका थिए ।

एमालेमा छलफल नै भएन
कसको नेतृत्वमा सरकारमा जाने भन्ने विषयमा एमालेभित्र छलफल हुन सकेको छैन । एमाले पोलिटब्युरो सदस्य प्रकाश ज्वालाको नेतृत्वमा सरकारमा जाने चर्चा छ । ज्वालाकै प्रस्तावमा यामलाल कँडेललाई संसदीय दलको नेतामा चयन गरिएको थियो । एमालेले आन्तरिक मामिला तथा कानुन मन्त्रालायसहित चार मन्त्रालय पाउनेछ ।

सभामुखमा शाही निर्विरोध 
प्रदेश ६ को सभामुखमा एमालेका सांसद राजबहादुर शाही आइतबार निर्विरोध निर्वाचित भएका छन् । प्रदेश सभा सदस्यको सचिवालयमा शाहीको मात्रै उम्मेदवारी प-यो । आइतबार दिउँसो १ः३० देखि २ बजेसम्म उम्मेदवारी दर्ताको समय तय गरिएको थियो ।

सोमबार दिउँसो १ बजे प्रदेश सभा बैठकमा शाहीको उम्मेदवारी निर्णयार्थ पेस गरी निर्वाचित भएको घोषणा गरिने सचिवालयका सचिव कृष्णहरि खड्काले बताए । एमालेका प्रदेश सभा सदस्य प्रकाश ज्वाला प्रस्तावक र माओवादी संसदीय दलका नेता महेन्द्रबहादुर शाही समर्थक रहेका छन् ।

उपसभामुख ५ फागुनमा 
उपसभामुखको निर्वाचन भने ५ फागुनमा हुनेछ । वाम गठबन्धनबीच भएको सहमतिअनुसार सभामुख एमाले र उपसभामुख माओवादीले पाउनेछ । तर, माओवादीबाट कसलाई उपसभामुख बनाउने भन्नेमा सहमति जुटेको छैन । सीता नेपाली, विमला केसी, कृष्णा शाह दाबेदार रहेका छन् ।