कांग्रेस जिल्ला सभापतिहरुको भेलाले ३८ बुँदे घोषणापत्र, समानुपातिकबाट एकपटक मात्र अवसर

काठमाडौं । नेपाली कांग्रेसका जिल्ला सभापतिहरुको भेलाले समानुपातिकबाट एकजनालाई एकपटक मात्र अवसर दिनेगरी व्यवस्थासहितको ३८ बुँदे घोषणापत्र जारीसहित सम्पन्न भएको छ ।

नुवाकोटको ककनीमा भएको दुई दिने भेलाले पार्टीको प्रस्तावित विधान मस्यौदाबारे २४ र समसामयिक राजनीति विषयमा १४ बुँदामा घोषणापत्र जारी गरेको छ । साधारण, क्रियाशील सदस्य रहने व्यवस्था भएको काङ्ग्रेसमा अब सम्मानित सदस्यको व्यवस्था थप गर्न माग घोषणापत्रमा गरिएको छ ।

घोषणापत्रमा पार्टीको जिल्ला, प्रदेश र संघीय संसदीय बोर्डले गाउँपालिका, नगरपालिका, प्रदेश, केन्द्रीय तहको उम्मेदवार तय गर्ने लगायतका पार्टी सुधारका काम गर्ने बताइएको छ । साधारण, क्रियाशील सदस्यता व्यवस्थित गर्ने, आरक्षितबाट मनोनित, निर्वाचित एक पटकभन्दा हुन नपाउने लगायत बुँदाहरु समेटिएको छ ।

घोषणापत्रमा पदाधिकारी संख्या बढाउनुपर्ने, मनोनित गर्ने अधिकारी केन्द्रीय सभापतिदेखि टोल कार्यसमितिको सभापतिलाई समान रुपले व्यवस्था गर्नुपर्ने, पार्टी नेता कार्यकर्ताको मर्यादाक्रम पार्टी विधानको अनुसूचीमै व्यवस्था गर्नुपर्ने उल्लेख छ ।

कुनै पनि तहमा चुनाव लडेका पार्टी सदस्यलाई त्यसै पदमा फेरि मनोनित गर्न नपाइनेगरी व्यवस्था गरिएको छ । समानुपातिक प्रणालीबाट एकपटक भन्दा बढी अवसर दिन नहुने व्यवस्था समेटिएको छ । जिल्ला तहदेखि केन्द्रीय तहसम्म प्रवक्ता राख्ने व्यवस्था गर्नुपर्ने उल्लेख छ ।

गाउँपालिका, नगरपालिका, उपमहानगरपालिकाको अधिवशेन वडाबाट आएका प्रतिनिधिबाट हुनुपर्ने, सबै स्थानीय तहका सभापतिहरु उपल्लो समितिको पदेन सदस्य रहने व्यवस्था हुनुपर्ने, जिल्ला, क्षेत्रीय कार्यसमितिका पदाधिकारी नियुक्ति गर्दा महाधिवेशन प्रतिनिधि, महासमिति सदस्यबाट गर्न पाइने व्यवस्था गर्नुपर्ने, स्थानीय, प्रदेश र सङ्घीय संसदमा निर्वाचित पार्टी सदस्यहरु सम्बन्धित तह तथा जिल्ला कार्यसमितिप्रति उत्तरदायी रहने व्यवस्था गर्नुपर्ने बुँदा घोषणापत्रमा उल्लेख छ ।