एयर एसियाले १३ करोड रुपैयाँ बक्यौता नतिरि किन सेवा बन्द गर्याे ?
सारांश
- काठमाडौं, १२ कात्तिक ।
- मलेसियाको जेट एयरलाइन्स एयर एसियाले नेपाल सरकारको करोडौं रुपैयाँ बक्यौता नतिरी सेवा बन्द गरेको छ ।
- काठमाडौं–क्वालालम्पुर उडान भर्दै आएको एयर एसियाले यात्रुको अभाव रहेको भन्दै गत असोज २७ गतेदेखि उडान स्थगन गरेको हो ।
काठमाडौं, १२ कात्तिक । मलेसियाको जेट एयरलाइन्स एयर एसियाले नेपाल सरकारको करोडौं रुपैयाँ बक्यौता नतिरी सेवा बन्द गरेको छ । काठमाडौं–क्वालालम्पुर उडान भर्दै आएको एयर एसियाले यात्रुको अभाव रहेको भन्दै गत असोज २७ गतेदेखि उडान स्थगन गरेको हो । कम्पनीले १ वर्षका लागि काठमाडौं गन्तव्यको व्यावसायिक उडान बन्द गरेको विमानस्थलका महाप्रबन्धक राजकुमार क्षेत्रीले जानकारी दिए । एयर एसियाले त्रिभुवन अन्तर्राष्ट्रिय विमानस्थललाई १३ करोड रुपैयाँ बक्यौता तिर्न बाँकी छ । यो विलम्ब शुल्क हो । कम्पनीले हालसम्म करीब ३० करोड रुपैयाँ रकम बुझाइसकेको विमानस्थलले जनाएको छ ।
एयरलाइन्सले अवतरण (ल्यान्डिङ), पार्किङ (विशौनी), एयर नेभिगेसन (सञ्चार तथा उड्डयन सहायक सेवा), विमानस्थल विकास शुल्क, कोठा भाडा लगायतमा बक्यौता तिर्नुपर्नेछ । एयर एसियाले वाइड बडी ए ३३० बाट दैनिक यहाँ उडान भर्दै आएको थियो । बाँकी बक्यौता तिर्नका लागि नेपालस्थित मलेसियाली राजदूतावासले पहल गर्ने आश्वासन दिएको छ । विलम्ब शुल्क तिर्नका लागि पहल गर्ने आशयसहित विमानस्थललाई पत्राचार गरिएको महाप्रबन्धक क्षेत्रीको भनाइ छ ।
नेपाल पर्यटन बोर्डलाई पनि सेवा शुल्कबापतको ७ करोड रुपैयाँभन्दा बढी रकम तिर्न बाँकी छ । नेपाल र मलेसियाबीच श्रमिक आपूर्ति गर्नेसम्बन्धी समझदारीपत्रमा सोमबार हस्ताक्षर भएको छ । श्रम, रोजगार तथा सामाजिक सुरक्षामन्त्री गोकर्ण विष्ट र मलेसियाका मानव संसाधन मन्त्री एम कुलासेगरानले उक्त समझदारीपत्रमा हस्ताक्षर गरेका हुन् । २ सरकारका उच्च अधिकारीले हस्ताक्षर गरेसँगै विगत ६ महिनादेखि रोकिएको मलेसियाको रोजगारी खुल्ने छ ।
नेपाल र मलेसियाबीच डेढ दशकभन्दा अघिदेखि श्रम सम्बन्ध रहेपनि श्रम सम्झौता हुन सकेको थिएन । नेपालबाट कामका लागि जानेमाथि ठगी भएको भन्दै सरकारले केही समयका लागि श्रम स्वीकृति रोकेको थियो । २ देशबीच भएको श्रम सम्झौतापछि एयरलाइन्सले पुनः सेवा शुरू गर्न सक्ने महाप्रबन्धक क्षेत्री बताउँछन् । वैदेशिक रोजगारीमा जाने कामदारलाई लक्ष्य गरी उडान भर्न शुरू गरिएको एयरलाइन्सले नेपाली कामदार रोकिएसँगै उडान बन्द गर्ने निर्णय गरिएको थियो । महाप्रबन्धक क्षेत्रीका अनुसार लगातार घाटा भएपछि उडान भर्न बन्द गर्ने भन्दै सेवा बन्दका लागि कम्पनीले निवेदन दिएकाेमा कामदारको समस्या समाधान हुने भएकाले उडान बन्द नगर्न सुझाइएको थियो ।
नेपालमा एयरबस वाइड बडी जहाजबाट उडान भर्ने एयरलाइन्स काठमाडौंबाट जाने यात्रु पाउनै छाडेपछि उडान बन्द गर्ने निष्कर्षमा पुगेको हो । हाल सो मार्गमा नेपाल एयरलाइन्स, हिमालय एयरलाइन्स र मालिन्डो एयरलाइन्सले उडान भर्दै आएका छन् ।
बोर्डलाई ७ करोड तिर्न बाँकी
एयर एसियाले नेपाल पर्यटन बोर्डलाई ७ करोेड २३ लाख रुपैयाँ बक्यौता तिर्न बाँकी छ । कम्पनीले पर्यटक सेवा शुल्कबापतको रकम बोर्डलाई तिर्न बाँकी रहेको पाइएको छ । विगत १ वर्षदेखि उक्त वायुसेवा प्रदायकले सो शुल्क नतिरेको बोर्डका सूचना अधिकारी रोहिणीप्रसाद खनालले जानकारी दिए । एयर एसियाको उक्त रकम जरिवाना सहितको हो । बोर्डले बक्यौता रकम तिर्न सो कम्पनीलाई पटक–पटक आग्रह गरेपनि अटेर गरेपछि नेपाल नागरिक उड्डयन प्राधिकरणमार्फत् रकम असुलका लागि पहल गरिएको बोर्डका प्रमुख कार्यकारी अधिकृत दीपकराज जोशीले जानकारी दिए ।
प्रतिक्रिया