ओली र प्रचण्डले हिजो प्रसाईंकोमा भात खाए, आज सातो खाए

काठमाडौंं, ७ फागुन । प्रधानमन्त्री निवास बालुवाटारमा जारी रहेको एमाले र माओवादी केन्द्रवीचको एकता बैठकमा एकाएक भक्तपुरका व्यवसायी दुर्गाप्रसाद प्रसाईको विषयले चर्चा पायो ।

एकाएक हिजो दुई अध्यक्षहरुवीच भक्तपुरका व्यवसायी प्रसाईंको घरमा भएको छलफलको फोटो किन सार्वजनिक भयो भन्ने विषयले चर्चा पायो । अन्य नेताहरुले ओली र प्रचण्डलाई उक्त फोटो सार्वजनिक भएपछि जनतामा राम्रो सन्देश नगएको भनेर सम्झाएका थिए ।

लगत्तै माओवादी केन्द्रका अध्यक्ष प्रचण्डले प्रसाईलाई फोन गरी फोटो किन सार्वजनिक गरेको भन्दै कडारुपमा प्रस्तुत भएका थिए । ओली र प्रचण्ड दुबैले प्रसाईलाई फोन गरेर झपारेपछि उनले आफूले नभएर छोरीले फोटो हालिदिएको जवाफ दिएका थिए ।

प्रधानमन्त्री ओली र प्रचण्डको एक्लाएक्लै बैठक प्रसाईको निवासमा भएको थियो । फोटोमा ओली र प्रचण्डसँगै प्रसाईले पनि सँगै खाना खाइरहेको देखिएको थियो । त्यसपछि उक्त तस्वीर सामाजिक सञ्जालहरुमा भाइरल भएको थियो । यद्यपि, उक्त फोटो नकारात्मक सन्देश दिने खालको भने थिएन ।