कोमल वलीको विषयमा त एमालेमात्र होइन राष्ट्रिय सहमति पो भो : केपी ओली

काठमाडौं, ११ माघ । पार्टी केन्द्रीय कार्यालयमा आयोजित पत्रकार सम्मेलनमा भावी प्रधानमन्त्रीका रुपमा हेरिएका अध्यक्ष केपी शर्मा ओलीले विभिन्न प्रश्नहरुको खुलेरै जवाफ दिए । उनले यतिबेला चर्चाको विषय रहेको राष्ट्रियसभामा भर्खरै एमाले प्रवेश गरेकी कोमल वलीको विषयमा पनि ठट्यौलो पारामै जवाफ दिए ।

पार्टीमा कुनै प्रकारको विवाद नभएको भन्दै अध्यक्ष ओलीले भने, “कोमल वलीको विषयमा त झन एमालेमात्रै होइन राष्ट्रिय सहमति पो भो ।” “एमालेले त कोमल वलीलाई उम्मेदवार बनाएको हो”, ओलीले प्रश्न गरे, “खै त ? कसैले कोमलको विपक्षमा उम्मेदवारी नै दिएनन् त ? वास्तवमा कोमल वलीको विषयमा त एमालेको मात्र होइन राष्ट्रिय सहमति पो भो ।”

अध्यक्ष ओलीले जे गरे पनि एमालेलाई अपजस दिनमात्रै खोजिएको बताउँदै कथा हाले, “टेबुलको बीचमा लोटा राखिएको रहेछ । धक्का लागेर लोटाको पानी पोखिएपछि एकजनाले भनेछ, टेबुलको छेउँमा राखेको भए पो हुन्थ्यो त । अब लोटा टेबुलको छेउँमा राख्नू । अर्को दिन टेबुलको छेउँमा राखिएको लोटामा धक्का लागेर फेरि पानी पोखिएछ । उसैले फेरि भनेछ, “लोटा टेबुलको बीचमा राखेको भए पो पोखिदैनथ्यो ।” यो कथा सुनाउँदै ओलीले थपे, “एमालेले नयाँलाई मौका दिएन भनेर खेदो खन्छन्, नयाँलाई मौका दिँदा पनि नयाँलाई किन दिएको भनेर खेदो खन्छन् ।”

(Diazepam)