कोरोनाका कारण हिजो ज्यान गुमाएकी महिलाकी शिशुको अवस्था कस्तो छ ?

कोरोना भाइरसका कारण हिजो मृत्यु भएकी महिलाको १२ दिने शिशुको स्वास्थ्य सामान्य रहेको छ । धुलिखेल अस्पतालमा राखिएका शिशुको स्वास्थ्य अवस्था सामान्य रहेको आफन्तले बताए । शिशुलाई अहिले अस्पतालमै आइसोलेसनमा राखिएको छ । शिशुलाई अहिले हजुरआमाले ल्याक्टोजिन खुवाइरहेकी छन् । अस्पतालमा मृतककी आमा, सानीआमा र उनका बुबाले शिशुको हेरचाह गरिरहेको आफन्त राजकुमार लामिछानेले बताए ।

शिशुसहित उनीहरु सबैजना अस्पतालको आइसोलेसनमा एउटै कोठामा बसेका छन् । चारैजनाको कोरोना परीक्षणका लागि स्वाव संकलन गरिएको छ भने परीक्षणको रिपोर्ट आउने क्रममा छ । कोरोना परीक्षण रिपोर्ट प्राप्त भएपछि शिशुको थप स्वास्थ्य साबधानी कसरी अपनाउने भन्ने टुंगो लगाइने चिकित्सकहरुको तयारी छ।

सिन्धुपाल्चोकको बाह्रविसे–९, राम्चेकी सुत्केरी महिलाको हिजो धुलिखेल अस्पतालमा मृत्यु भएको थियो । उनी नेपालमा कोभिड–१९ को संक्रमणबाट मृत्यु हुने पहिलो नेपाली हुन् । गत वैशाख २४ गते ती महिलाले काठमाडौँको टिचिङ अस्पतालमा शिशुलाई जन्म दिएकी थिइन्।