को बन्ला प्रधानन्यायाधीश ! सिफारिसका लागि आज वैठक बस्दै

शिखरन्युज, २३ साउन । सर्वोच्च अदालतमा चार महिनादेखि प्रधानन्यायाधीश पद खाली छ । प्रधान न्यायाधीश सिफारिसका लागि आज संवैधानिक परिषदको बैठक बस्दैछ । न्याय परिषद् बैठकले यस अघि नै वरिष्ठताका आधारमा न्यायाधीश ओमप्रकाश मिश्र र न्यायाधीश चोलेन्द्रशमशेर जवराको नाम संवैधानिक परिषदमा पठाइसकेको छ ।

यसअघि जेठ २९ गते संवैधानिक परिषदले सर्वोच्चका न्यायाधीशमध्ये बरिष्ठतम न्यायाधीश दीपकराज जोशीलाई प्रधानन्यायाधीशमा सिफारिश गरेको थियो । संसदीय सुनुवाइ समितिले जोशीलाई अस्वीकृत गरिदियो । समितिले जोशीको न्यायपालिकामा काम गर्ने योजना नभएको, शैक्षिक प्रमाणपत्रमा विवाद उठेको भन्दै अस्वीकृत गरेको हो ।

यसरी संसदीय सुनुवाई समितिले प्रधान न्यायाधीशमा अस्वीकृत गरेको नेपालमा पहिलो पटक हो । प्रधानमन्त्री अध्यक्ष रहने संवैधानिक परिषदको वैठकले सिफारिस गरेको अस्वीकृत गरिएको हो ।

अहिले बहालावाला न्यायाधीशमध्ये ओमप्रकाश मिश्र र चोलेन्द्र शमशेर राणा प्रधानन्यायाधीशका दाबेदार हुन् । दाबेदार दुई जनामध्ये बरिष्ठताको आधारमा ओमप्रकाश मिश्र पहिलो नम्बरमा छन् । आज बस्ने परिषद वैठकले बरिष्ठतम् न्यायाधीश मिश्रको नाम सिफारिस हुने सम्भावना दखिन्छ ।