को हुन् हृदयेश त्रिपाठी

हृदयेश त्रिपाठीको जन्म वि सं २०१६ साल आषाढ ४ गते कठहवा गाविस गुणेपर्सेनी ३, मा भएको हो । बुवा हरिशंकर त्रिपाठी र आमा कुन्तीदेवीबाट जन्मिएका त्रिपाठीका दुई छोरी र एक छोरा छन् । त्रिपाठीले राजनीति शास्त्रमा स्नातक तह उत्तीर्ण गर्नु भएको छ । त्रिपाठी वामपन्थी विचारधाराबाट प्रभावित भई वि सं२०३१ सालदेखि राजनीतिमा सक्रिय हुनुभएको हो ।

नेपाल सदभावना पार्टीबाट तत्कालीन प्रतिनिधिसभा सदस्य समेत भएको त्रिपाठी २०६४ सालको संविधानसभा चुनावमा नवलपरासी क्षेत्र नम्बर ६ बाट विजयी हुनु भएको थियो । तर २०७० सालको चुनावमा भने उहाँ सोही क्षेत्रबाटै पराजित हुनुभएको थियो । तत्कालीन तमलोपाको उपाध्यक्ष तथा संसदीय दलको उपनेता समेत भइसकेका त्रिपाठी राजपाको पनि सहअध्यक्ष भैसक्नुभएको छ ।

उहाँ गणतन्त्रपछि र अघि गरी पटकपटक मन्त्री हुनुभएको छ । उहाँले राजनीति गर्ने क्रममा झण्डै २ वर्ष भूमिगत जीवन, ८ महिना निर्वासन र २१ महिना राजनीतिक बन्दीका रुपमा जेल जीवन बिताउनु भएको थियो । निक्कै चतुर राजनीतिक खेलाडीका रुपमा स्थापित त्रिपाठी पछिल्लो समयमा मधेसवादी शक्तिका तर्फबाट महत्वपूर्ण राजनीतिक निर्णय गर्ने ठाउँहरुमा तथा विभिन्न सरकारमा निरन्तर सहभागी हुनुहुन्छ । पछिल्लो समय राजपा त्यागेर उहाँ एमालेको सूर्य चिन्ह लिएर नवलपरासीबाट उम्मेदवार वन्नुभएको हो ।